Փորձագետ. Վերջին երկու տարվա ընթացքում ղարաբաղյան հակամարտության շուրջ իրավիճակը փոխվել է
Հայաստանի և Ադրբեջանի նախագահների՝ Շվեյցարիայում կայացած հանդիպումից առանձնապես որևէ արդյունք սպասելի չէր, միայն ևս մեկ անգամ միջազգային հանրության, հայկական կողմից ընդգծվեց, որ ղարաբաղյան հակամարտության լուծումը պետք է լինի խաղաղ, այլ ճանապարհ չկա, ինչին հակառակ էր գործում Ադրբեջանը: Լրագրողների հետ հանդիպման ժամանակ նման դիտարկում արեց «Եվրոպական ինտեգրացիա» հասարակական կազմակերպության անդամ, քաղաքական հարցերով փորձագետ Մանվել Ղումաշյանը:
Նա նշեց, որ ղարաբաղյան հակամարտության շուրջ իրավիճակը փոխվել է, այն չէ, ինչ մեկուկես-երկու տարի առաջ՝ կապված տարածաշրջանում տեղի ունեցող զարգացումների, Ադրբեջանի ներքին ու արտաքին քաղաքականության հետ:
«Մերձավոր Արևելքում, հատկապես Սիրիայում տեղի ունցող իրադարձությունները լուրջ ազդեցություն ունեն մեր տարածաշրջանում զարգացող խնդիրների վրա: Ռուս-թուրքական հարաբերությունների վատթարացումն անմիջապես ազդեցություն կարող է ունենալ ղարաբաղյան խնդրի վրա»,- ասաց քաղաքագետը:
Մ. Ղումաշյանի խոսքով, ԵՄ-ն, ՆԱՏՕ-ն, ԱՄՆ-ը նույնպես փոխել են իրենց վերաբերմունքը Ադրբեջանի նկատմամբ. «Տեսնում ենք միջազգային հանրության դիրքորոշման կոշտացում Ադրբեջանի հանդեպ: Նման պարագայում Ադրբեջանին մի քայլ է մնում՝ սրել իրավիճակը սահմանին, որը հետագայում կարող է վաճառել, սակարկել բանակցությունների ժամանակ»:
Քաղաքագետը նշեց, որ Ադրբեջանի ներքաղաքական կյանքում նույնպես իրավիճակն անկայուն է, մեծ դժգոհություններ են տեղի ունենում:
«Նման պարագայում ամենահեշտ միջոցն արտաքին թշնամու փնտրտուքն է: Իսկ Ադրբեջանի պարագայում պետք չէ շատ փնտրել այդ թշնամուն»,- ասաց Մ. Ղումաշյանը:
Պատասխանելով հարցին, թե հաշվի առնելով այն հանգամանքը, որ Ադրբեջանի դիրքորոշումը չի փոխվում նույնիսկ միջազգային հանրության կոշտ հայտարարություններից հետո, նման պայմաններում հայկական կողմի անելիքները որո՞նք պետք է լինեն, փորձագետն ասաց. «Հաշվի առնելով այն, որ քանի դեռ Ալիևի վարչակարգն է Ադրբեջանում նստած, դժվար թե ղարաբաղյան խնդրում դրական տեղաշարժ լինի, նախ պետք է մեր երկրի ներսում ստեղծվի այնպիսի իրավիճակ, որ կարողանանք երկիրը զարգացնել՝ դրանով իսկ նպաստելով սահմանների ուժեղացմանը: Միաժամանակ պետք է մասնակցենք բոլոր միջազգային պաշտպանական միավորումների աշխատանքներին՝ կլինի ՀԱՊԿ, ՆԱՏՕ-ի հետ ծրագրեր, կամ այլ ձևաչափեր»: