Ձեր վստահելի աղբյուրը

Հայ օպերային երգչուհի, սոպրանո Արաքս Մանսուրյանը հայկական երգարվեստի միջոցով օտարներին ներկայացնում է հայոց պատմությունը: Երգչուհին դասավանդում է Սիդնեյի կոնսերվատորիայում՝ օտարազգիներին ծանոթացնելով հայկական երգարվեստի հետ։ Նրա շնորհիվ բազմաթիվ օտարազգի երիտասարդ երգիչների երգացանկերում տեղ են գտել Կոմիտասի, Կանաչյանի, Մելիքյանի, Սպենդիարյանի և այլ հայ երաժիշտների ստեղծագործություններ։

Panorama.am-ի հետ զրույցում Արաքս Մանսուրյանն ասաց. «Զարմանալի է, երբ երգում եմ Կոմիտաս, սովորեցնում եմ Կոմիտաս, հուզվում են առանց հասկանալու բառերի իմաստը: Երաժշտությունն արդեն ասում է ինչ-որ մի մասը մեր ապրած կյանքի, տարած դժվարություների: Միշտ ասում են՝ ինչ տխուր է: Երաժշտությունը զգում են, անմիջապես հասկանում են և սիրում: Ունեմ կորեացի, չինացի, ավստրալիացի ուսանողներ, խնդրել են իրենց Կոմիտաս դասավանդեմ: Իմ բոլոր ուսանողներին նվիրել եմ իմ՝ Կոմիտասի ձայներիզը, որ լսեն: Սա է իմ կապը օտարների հետ, այսպես կարողանում եմ իրենց ներկայացնել մեր պատմությունը»:

Երգչուհին նաև նշեց, որ հանդիսատեսն էլ լսելով Կոմիտաս՝ մոտենում և ասում է՝ «թեև բառերը չենք հասկանում, բայց ինչ հուզիչ է, ինչ երգեր են»:

Արաքս Մանսուրյանը 2016 թ. մարտի 20-28-ը լինելու է Ճապոնիայում, որտեղ մասնակցելու է Հայոց ցեղասպանության 100-րդ տարելիցին նվիրված միջոցառմանը:

«Հրավեր եմ ստացել դեսպան Հրանտ Պողոսյանի և ճապոնացի դաշնակահար Տակահիրո Ակիբայի կողմից: Համերգին մեկ-երկու երգ եմ կատարելու Կոմիտասից, ունենալու եմ վարպետության դասեր, նաև աշխատելու եմ դաշնակահարների հետ, ովքեր նվագակցում են երգիչներին»,- ասաց երգչուհին:

Արաքս Մանսուրյանը ծնվել է 1946 թվականին Բեյրութում։ 1947 թվականին հայրենադարձել է։ Սովորել է Ռոմանոս Մելիքյանի անվան երաժշտական ուսումնարանում, 1977 թվականին ավարտել է Երևանի Կոմիտասի անվան պետական կոնսերվատորիան։ 1977-1992 թթ.` Երևանի օպերայի և բալետի, 1992 թվականից` Սիդնեյի օպերային թատրոնների մեներգչուհի է: Դերերգերից են՝ Էլիզաբեթ («Դոն Կարլոս»), Նեդդա («Պայացներ»), Լեոնորա («Տրուբադուր»), Աիդա («Աիդա»), Շուշան («Դավիթ-Բեկ»), Անուշ («Անուշ»)։ Վերջին դերերգը կատարել է նաև Թբիլիսիի օպերային թատրոնում, Թումանյանի ծննդավայր Լոռիում և 1989 թվականին՝ ԱՄՆ-ում։ Մենահամերգներ է ունեցել Հայաստանում և արտասահմանյան մի շարք երկրներում՝ ծրագրում եվրոպական երգահանների կողքին ունենալով Կոմիտաս, հոգևոր միջնադարյան երգեր, հայ երգահանների ստեղծագործություններ։ Բնակվում է Ավստրալիայի Սիդնեյ քաղաքում և հանդիսանում է Սիդնեյ Օպերա Հաուսի մենակատար, ուր հանդես է գալիս այնպիսի դերերգերով, ինչպիսիք են՝ Լիու («Տուրանդոտ»), Աիդա («Աիդա»), Ֆլորիա Տոսկա («Տոսկա»), Դեզդեմոնա («Օթելլո»), Միմի («Բոհեմ»), Կատյա Կաբանովա («Կատյա Կաբանովա»), Սանտուցցա («Գեղջկական ասպետություն»), Ֆատա Միրգանա («Սերն առ երեք նարինջներ»), Էլիզաբեթ Վալուա («Դոն Կարլոս»), Էլիզաբեթ («Տանհոյզեր»), Մադլոն («Անդրե Շենյե»), Կոստանիչկա («Ենուֆա»), Կունդրի («Պարսիֆալ»), Ամելի Գրիմալդի («Սիմոն Բոկանեգրա»), Ամելիա («Դիմակահանդես»), Իզոլդա («Տրիստան և Իզոլդա»), Լեոնորա («Ճակատագրի ուժը») և այլն։ 2015 թվականին Առաջին հանրապետության տոնի առթիվ Արաքս Մանսուրյանին շնորհվել է «Հայրենիքին մատուցած ծառայությունների համար» 1-ին աստիճանի մեդալ:

«Ինձ ողջ կյանքում թվացել է, թե հոգուս բազում կարոտներից կա մեկը` ժառանգականորեն հարազատ, արյունս տակնուվրա անող և հավիտենականորեն անհասանելի... Դժվարանում էի գտնել դրա ստույգ անվանումը, սակայն երբ Արաքս Մանսուրյանի կատարմամբ լսեցի հայ հոգևոր երգերը, հասկացա, որ ինձ հենց այդ էր պակասում՝ դարերից եկած հայ ոգեղենության ազնվական ու լուսավոր մարմնավորում»,- ասել է Սերգեյ Փարաջանովը: