Ձեր վստահելի աղբյուրը

Արդեն երրորդ տարին է Հայաստանում իրականացվում է գյուղացիական տնտեսությունների աջակցության տրամադրման ծրագիրը: Ինչպես այսօր լրագրողների հետ հանդիպման ժամանակ ասաց  ՀՀ աշխատանքի և սոցիալական հարցերի նախարարության Զբաղվածության պետական գործակալության պետ Արտակ Մանգասարյանը, 2015թ-ին «Սեզոնային զբաղվածության խթանման միջոցով գյուղացիական տնտեսությանն աջակցության տրամադրում» անվանումով ծրագիրն իրականացվել է հանրապետության բոլոր մարզերի 472 գյուղական համայնքներում:

Կնքված պայմանագրերի թվով առաջին տեղում Շիրակի մարզն է, որին հաջորդում են Կոտայքի, Արագածոտնի, Արարատի, Գեղարքունիքի մարզերը: Համեմատաբար փոքր թվով պայմանագրեր են կնքվել Վայոց ձորում: Ընդհանուր առմամբ, ըստ  Արտակ Մանգասարյանի,  պայմանագիր է կնքվել  4793 հողօգտագործողների հետ: Արդյունքում, ծրագրում ընգրկվել է 6 հազար 285 շահառու:

Նրա խոսքերով՝ ծրագրի նպատակն է  ապահովել սեզոնային զբաղվածություն հանրապետության առավել խոցելի և աղքատ գյուղական բնակավայրերի բնակչության շրջանում, այդպիսով մեղմելով սոցիալական լարվածությունը:

«Ծրագիրն առաջին անգամ փորձարկվել է 2013թ-ին Արմավիրի մարզում՝ կարկտահարությունից տուժած համայնքներին աջակցելու նպատակով: Ծրագրի ավարտից հետո հող օգտագործողների շրջանում անցկացված հարցումների արդյունքները հասատատեցին, որ ծրագիրն իսկապես պահանջարկված է և կարող է լուրջ դերակատարում ունենալ բնական աղետներից տուժած տնտեսությունների առողջացման և աշխատանքի արտադրողականության բարձրացման գործում»,- ասաց Ա.Մանգասարյանը:

Ուստի, այս ամենը հաշվի առնելով՝ 2014թ-ից այն տեղ է գտել Զբաղվածության կարգավորման ամենամյա պետական ծրագրերի շարքում: Այն առաջնահերթության կարգով նախատեսված է իրականացնել բարձր լեռնային և սահմանամերձ բնակավայրերում, ինչպես նաև բնական աղետներից տուժած բնակավայրերում:

«Ծրագրի շրջանակում հողօգտագործողները յուրաքանչյուր աշխատանքային օրվա համար ստանում են գումար: Կարող են ընդգրկվել նաև տվյալ ընտանիքի մյուս անդամները: Ծրագրով նախատեսված է վճարել նաև հողօգտագործողի կողմից ներկայացված վարձու աշխատողներին»,- նշեց Արտակ Մանգասարյանը:

Մեկ օրվա աշխատանքի դիմաց հողօգտագործողին և ծրագրում ընդգրկված հողօգտագործողի ընտանիքի անդամին վճարվում է 4 հազարական դրամ,  ևս 3 հազար դրամ վճարվում է ծրագրում ընդգրկված վարձու աշխատողին: Բացի այդ,  գյուղացիական տեխնիկայի 1 ժամվա աշխատանքի համար նախատեսվում է 5 հազար դրամ: Ծրագրի ընդհանուր արժեքը մեկ հողօգտագործողի համար չի կարող գերազանցել 350 հազար դրամը:

Ա.Մանգասարյանը հայտնեց, որ այս տարի ծրագրի շրջանակներում մշակվել է 8076 հա հողատարածք: Մշակվել են տարբեր մշակաբույսեր՝ խնձոր, դեղձ, ելակ, մորի, վարունգ, լոլիկ, կաղամբ, ցորեն, գարի, եգիպտացորեն, կարտոֆիլ և այլն: Նա նաև տեղեկացրեց, որ ծրագրի շրջանակներում որոշ համայնքներում շատ գյուղացիներ այգիներ են հիմնել:

«Այս տարի գյուղացիների շրջանում ակտիվություն նկատվում է: Եթե նախորդ տարի 2500 պայմանգիր ենք կնքել, ապա այս տարի դրանք 3 հազարից ավելին են: Այս տարվա ընթացքում լուրջ աշխատանք ենք կատարել գյուղացիների շրջանում տեղեկացվածության մակարդակը բարձրացնելու համար, բայց միևնույն է՝ ծրագրի ամբողջ ծավալը չի օգտագործվել»,- ասաց Զբաղվածության պետական գործակալության պետը՝ հավելելով, որ այս տարի ծրագրով նախատեսված է 1 մլրդ 125 մլն դրամ, որից գյուղացիներին տրամադրվել է շուրջ 900 մլն-ը:

Նա հույս հատնեց, որ 2016-ին արդեն շահառուների թիվն ավելին կլինի և ծրագիրն ամբողջ ծավալով կօգտագործվի:

Ի դեպ, Արտակ Մանգասարյանը նշեց, որ շահառու դառնալու համար շատերն են դիմում, սակայն ոչ բոլորն են ընդգրկվում:

«Եթե նրանք չեն համապատասխանում սահմանված չափանիշներին, այսինքն՝ ապահովված ընտանիքներն են, ապա նրանց մերժում ենք: Ծրագրի նպատակն է լուծել սոցիալապես անապահով ընտանիքների, աշխատաշուկայում անմրցունակ անձանց զբաղվածության խնդիրը»,- ընդգծեց նա: