Ձեր վստահելի աղբյուրը

Խաղաղ ու  առանց պատերազմների աշխարհ, անհոգ և երջանիկ մանկություն, առողջություն բոլորին: Երեխաների ցանկություններն են 2016 թվականի համար:

Երևանի հանրակրթական դպրոցների բարձր առաջադիմություն ցուցաբերած 300 երեխա այսօր հյուրընկալվել էին Բաղրամյան 26՝ նախագահի նստավայր, մասնակցելու ամենամյա տոնական միջոցառմանը՝ մուլտհերոսներ, հեքիաթների հերոսներ, երգ ու պար, Ձմեռ պապ և Ձյունանուշ:

«Ուրախ ենք, որ այստեղ ենք, որ այս ամենը մեզ համար է: Մեծ պատիվ է մեզ համար լինել այստեղ»,- ասում էին երեխաները:

Նրանք բոլորն էլ առաջին անգամ էին նախագահական նստավայրում:

«Հենց այսպես էլ պատերացնում էի՝ մեծ, շքեղ: Միջոցառումն էլ շատ լավ է: Գոհ եմ: Ուզում եմ, որ եկող տարվա ընթացքում բոլորս էլ ավելի լավ սովորենք, ավելի բարձր առաջադիմություն լինի»,- Panorama.am-ի հետ զրույցում ասաց 196-րդ դպրոցից Աննան:

«Ցանկանում եմ, որ հայ ժողովուրդը, բոլոր մանուկները ժպիտներով դիմավորեն 2016 թվականը: Երջանկության, հաջողության տարի լինի», «Առողջություն եմ ցանկանում բոլորին: Երկրներում ոչ մի պատերազմներ չլինեն», «Ցանկանում եմ, որ սահմանից երբևէ վատ լուր չհասնի մեզ, զինվորները վերադառնան իրենց տները», «Թող Նոր տարին երեխաներին բերի երջանկություն, խաղաղություն, սահմանին վիճակը լավ լինի, որ մեր զինվորները չզոհվեն»: Երեխաների ցանկություններն են ու նաև խնդրանքը Ձմեռ պապից:

Նրանք նաև խնդրել են պլանշետ, համակարգիչ, հեռախոս, գրենական պիտույքներ, չմուշկներ

«Նաև այսպիսի մեծ տուն եմ ուզում»,- ասաց 4-րդ դասարանցի Նունեն: 

Երեխաներից շատերը դեռևս չեն որոշել, թե ինչ են դառնալու: Իսկ ովքեր որոշել են՝ «բժշկուհի, սրտաբան», «նախագահ», «մաթեմատիկոս-նախագահ»:

«Դեռ չեմ որոշել: Կարող է  ցանկանամ նախագահ դառնալ: Որ նախագահ դառնամ, այստեղ շատ բան չեմ փոխի: Բայց պետք է երեխաների հետ շատ շփվել»,- ասաց 85-րդ դպրոցից Վրույրը:

35-րդ դպրոցից 6-րդ դասարանի աշակերտուհի Մարին էլ դեռ չի ընտրել մասնագիտություն, բայց նախ ուզում է լավ մարդ լինել, հետո արդեն կորոշի՝ ինչ է ուզում դառնալ:

«Ես շատ ուրախ եմ, որ այստեղ եմ, քանի որ ոչ բոլորը կարող են այցելել նախագահի նստավայր: Գոհ եմ հյուրասիրությունից, նախագահի և նախագահի տիկնոջ հյուրընկալությունից: Ես ցանկանում եմ, որ մարդիկ երջանիկ լինեն, մայրերի աչքերից արցունքներ չկաթի, զինվորներն էլ ստիպված չլինեն սահմանը հսկել: Խաղաղություն եմ ուզում»,- ասաց Երևանի 59-րդ դպրոցից Վլադ Վարդազարյանը:

Նշենք, որ Ամանորի և Սուրբ Ծննդյան տոների կապակցությամբ ՀՀ նախագահի նստավայրում այսօրվանից մեկնարկել են երեխաների համար անցկացվող ամենամյա տոնական միջոցառումները: Տոնական միջոցառումներին ամեն տարի մասնակցում են 6-12 տարեկան շուրջ 1000 երեխա մայրաքաղաքից, մարզերից, Արցախից:

Միջոցառումները Բաղրամյան 26-ում կշարունակվեն նաև դեկտեմբերի 23-24-ին, հյուրերը լինելու են՝ ՀՀ ԶՈՒ զինծառայողների, Երկրապահ կամավորական միության անդամների, զոհված և հաշմանդամ ազատամարտիկների ընտանիքների երեխաներ և թոռնիկներ, ՀՀ ոստիկանության և ազգային անվտանգության ծառայության աշխատակիցների երեխաներ, սահմանամերձ մի շարք համայնքների, Օլիմպիադաների մրցանակակիր երեխաներ, սահմանափակ կարողություններով և  Հայաստանում ապաստան գտած սիրիահայ երեխաներ:

Սահմանամերձ համայնքներից երեխաները մայրաքաղաք կժամանեն մեկ օր առաջ և նախագահի նստավայրում տոնական միջոցառմանը մասնակցելուց բացի նրանց համար կկազմակերպվի մշակութային լրացուցիչ ծրագիր՝ այցելություն Հայաստանի պատմության թանգարան և Հովհաննես Թումանյանի  թանգարան, նաև ավտուբուսով կշրջեն գիշերային տոնական Երևանով: