Ձեր վստահելի աղբյուրը

Եկող տարին չի զիջելու իր ծանրությամբ և անսպասելի վիճակներով: Լրագրողների հետ հանդիպմանը նման կարծիք հայտնեց տնտեսագետ, ԲՀԿ-ական պատգամավոր Միքայել Մելքումյանը Հայաստանի տնտեսությունը գլոբալ մարտահրավերների պայմաններում. տարեվերջյան դիտարկումներ» թեմայով ասուլիսի ժամանակ:

Հիշեցնենք, որ ՀՀ ազգային վիճակագրական ծառայության տվյալներով այս տարվա նոեյմբերին նախորդ տարվա`  2014-ի նոյեմբերի համեմատ ՏԱՑ-ը նվազել է 2.9 տոկոս, իսկ նախորդ ամսվա` հոկտեմբերի նկատմամբ՝ 17.3 տոկոսով:

Անկման 50 տոկոսի մեղավորը, ըստ Մելքումյանի, արտաքին ազդակներն են, իսկ 50 տոկոսը՝ անարդյունավետ կառավարումը:

Տնտեսական ցուցանիշների նման անկումը, Մելքումյանի գնահատմամբ, 1-2 տարվա խնդիր չէ. «Մինչ այդ էլ մենք արմատական շատ հարցեր չենք լուծել, դրա հետևանք է: Հաջորդ տարվա համար 2.2 տոկոս աճը երբևիցե չի ծրագրվել, բայց մենք 2010-ին ունեցել ենք այդքան աճ»:

Նա կարծիք հայտնեց, որ տնտեսության դիվերսիֆիկացման, հարկային արտոնությունների ուղղությամբ կառավարության ջանքերը դեռևս արդյունք չեն տալիս, քանի որ զուգորդված չեն վստահության վերականգնման կոնկրետ քայլերով:

«Հանրաքվեն ցույց տվեց, որ մենք վստահության վերականգնման խնդիր ունենք: Սա վերաբերում է նաև բիզնեսին: Պետք է լինի մրցակցային հարաբերությունների որակ, հակակոռուպցիոն արդյունավետ քաղաքականություն, բիզնեսի համար վստահելի միջավայրի ստեղծում: Տնտեսական ջանքերը պետք է ամրագրվեն քաղաքական կամքով»,-ասաց նա: