Ձեր վստահելի աղբյուրը

2015 թվականին արձանագրվել է Սևանա լճի ջրի որակի բարելավում և ձկնապաշարի՝ մասնավորապես սիգի ավելացում: Այս մասին այսօր տարեվերջյան ամփոփիչ ասուլիսում ասաց ՀՀ բնապահպանության նախարար Արամայիս Գրիգորյանը՝ ներկայացնելով նախարարության այս տարվա արված աշխատանքը, ձեռքբերումներն ու հաջողությունները:

Նրա խոսքերով՝ Սևանա լիճ է բաց թողնվել 605.447 մանրաձուկ, որից 366.667 հազ. հատը՝ պետական բյուջեի միջոցների հաշվին:

Ա.Գրիգորյանը նշեց, որ 2015 թվականի առաջին կիսամյակի ընթացքում «Սևանի իշխանի պաշարների վերականգնման և ձկնաբուծության զարգացման» հիմանադրամի կողմից անհատույց տրամադրվել և Սևանա լիճ է բաց թողնվել 2.5-50 գրամանոց գեղարքունիի շուրջ 238.780 հատ մանրաձուկ:

«Սևանա լճում ավելացել են ձկան պաշարները, սակայն մեզ մտահոգում է ձկնագողությունը: Այսօր դեռևս շարունակվում են Սևանա լճից ձկնագողության դեպքերը: Բոլորս էլ տեսնում ենք, որ փողոցներում, շուկաներում վաճառվում է սիգ տեսակի ձուկ, որի որսը այս ժամանակահատվածում արգելված է: Ցավում եմ, բայց սա իրականություն է, այստեղ կարևորում եմ նաև ԶԼՄ-ների աշխատանքը: Եթե տեսնում եք նման դեպքեր, ապա նկարահանեք, որպեսզի մարդիկ ամաչեն և այլևս  որսագողությամբ չզբաղվեն»,- ասաց Ա.Գրիգորյանը՝ հավելելով, որ թեև բնապահպանական տեսչությունը վերահսկողություն իրականացնում է, ամեն օր առգրավվում է տարբեր քանակի ձուկ, տույժեր են ներկայացնում քաղաքացիներին, բայց, ցավոք սրտի, այդ դեպքերը շարունակվում են:

Ըստ նախարարի՝ ազգովի պետք է պայքարել այս բացասական երևույթի դեմ. «Եթե մենք կարողանանք 2 տարով փակել Սևանա լիճը, որպեսզի ձկնագողությունը դադարի, երկու տարի հետո կարող ենք խոսել սիգայի արդյունաբերական որսի մասին»:

Նա նաև ասաց, որ նախարարությունը հսկողություն կարող է իրականացնել միայն աշխատանքային ժամերին, իսկ ոչ աշխատանքային ժամերին, ինչպես նաև՝ շաբաթ և կիրակի օրերին իրավունք չունեն ստուգումներ անցկացնել: Այդ նպատակով ՀՀ կառավարությանը ներկայացվել է առաջարկություն, որպեսզի նախարարությանը հնարավորություն տրվի նաև ոչ աշխատանքային ժամերին և օրերին հսկողություն իրականացնել:

Լրագրողի դիտարկմանը, թե ձկնագողության պատճառներից մեկը մարդկանց սոցիալական խնդիրն է, քանի որ նրանց ապրուստի միակ միջոցը ձկան վաճառքն է, Արամայիս Գրիգորյանը պատասխանեց. «Մենք գիտենք, որ հանրապետությունում կա սոցիալական խնդիր, բայց նաև, եթե մեզ համար Սևանա լճի պաշարները արդիական չլինեն, մենք չենք կարող խոսել ձկան արդյունաբերական որսի մասին: Մեզ համար ո՞րն է ձեռնտու՝ մեկ երկու տարի պահպանություն իրականացնենք և հետո օրինական ճանապարհով թույլ տանք որս կատարեն, թե՞ թողնենք ապօրինի որսը շարունակվի և ձկան պաշարներ չունենանք»:

Նա նաև նշեց, որ եթե վերավաճառողները չլինեն, ապա ձկան որսն էլ չի լինի: