Ձեր վստահելի աղբյուրը

Ամանորի և Սուրբ Ծննդյան տոների առթիվ այսօր ՀՀ նախագահի նստավայրում հանրապետության ղեկավարի անունից ընդունելություն է կազմակերպվել Հայաստանի գործարար համայնքի ներկայացուցիչների համար:

Հանդիպումից հետո Զանգեզուրի պղնձամոլիբդենային կոմբինատի վարչական տնօրեն Վահե Հակոբյանը լրագրողների հետ զրույցում ասաց, որ թեև նավթի գների անկումը սկսվեց 2014թ-ից և շարունակվում է մինչ այս պահը, բայց կարողացել են պահել ընկերության տնտեսությունը և ոչ մի աշխատատեղ չեն կրճատել:

«Ինչպես հանդիպմանը նշեց նախագահը, դա կախված է ՌԴ-ի դեմ սահմանված պատժամիջոցների հետ, և մենք այս պարագայում ոչինչ անել չենք կարող՝ ազդելու դրա վրա։ Բայց մենք չենք ազատել աշխատանքից ոչ մեկի, իսկ արտերկրում գործող ավելի խոշոր կազմակերպություններ կրճատել են մինչև 2000-3000 աշխատողի, որպեսզի մի կերպ կարողանան դիմանալ»,-ասաց նա։

Անդրադառնալով Զանգեզուրի պղնձամոլիբդենային կոմբինատի հետագա գործունեությանը՝ Վահե Հակոբյանը նշեց, որ 2016թ-ին պատրաստվում են սկսել Լիճքի հանքավայրի շահագործումը, ինչը ենթադրում է նոր աշխատատեղերի ստեղծում։ Ըստ նրա՝  նախատեսվում է ստեղծել 200-250 նոր աշխատատեղ։

«Պետք է այս մեկ-մեկուկես տարին դիմանալ՝ նոր ֆինանսական ներարկումներ անել, ու ինձ թվում է, որ ամեն ինչ նորմալ կլինի: Մենք պինդ ենք, մենք կանք և կմնանք»,-նշեց Վահե Հակոբյանը: