Ձեր վստահելի աղբյուրը

«Բոլորի համար խաղաղությունն ամենացանկալին է: Երևանում կամ Տավուշում ապրող երեխաների, մեծահասակների համար խաղաղությունը նույն բարձր արժեքն ունի, որովհետև պատերազմը շատ վատ բան է: Մենք ձեզ ցանկանում ենք, որ երբեք, որևէ անգամ կրակոց չլսեք, եթե լսեք՝ միայն հեռուստացույցով: Ամեն ինչ անելու ենք, որպեսզի այդպես լինի: Շատ ֆիլմեր դիտեք, կարդացեք: Աշխարհում ամենալավ բանը գիրքն է»,-շնորհավորելով նախագահական նստավայրում հյուրընկալված երեխաներին՝ ասաց նախագահ Սերժ Սարգսյանը:

Նշենք, որ Ամանորի և Սուրբ Ծննդյան տոների կապակցությամբ ՀՀ Նախագահի նստավայրում այսօր հյուրընկալվել էին սահմանամերձ մարզերի (Գեղարքունիք, Վայոց ձոր, Արարատ, Տավուշ) մի շարք համայնքների, ինչպես նաև Հայաստանում ապաստան գտած սիրիահայ երեխաներ, սահմանափակ կարողություններով և Օլիմպիադաների («Կենգուրու», «Մեղու») մրցանակակիր երեխաներ:

«Ես և Ռիտա Սարգսյանը շնորհավորում ենք Ձեզ Նոր տարվա կապակցությամբ: Ցանկանում ենք, որպեսզի Նոր տարում ձեր բոլոր ցանկություններն  իրականություն դառնան: Ցանկանում ենք, որ այս արձակուրդային օրերը, տոնական օրերը ձեզ նոր, լավ եռանդ հաղորդեն, որպեսզի կարողանաք ավելի լավ սովորել, կարողանք դառնալ մեր երկրի արժանավոր և արժանապատիվ քաղաքացիներ:

Ցանկանում ենք, որ այս և նման օրերը ձեզ լավ տրամադրություն հաղորդեն, որպեսզի դուք լինեք ավելի երջանիկ, լավատես, տրամադրվեք բարի գործերին: Ուզում ենք, որպեսզի դուք լինեք 100 տոկոս վստահ, որ ձեր ծնողները, ընդհանրապես, բոլոր մեծահասակներն ամեն ինչ անելու են, որպեսզի դուք բարով մեծանաք, որպեսզի դուք կյանքի նկատմամբ լցվեք լավատեսությամբ, լինեք բարի, որովհետև աշխարհն ավելի լավն են դարձնում բարի մարդիկ, լավատեսությամբ լցված մարդիկ: Չարությամբ, կեղծությամբ, անհնար է լավ գործեր կատարել:

Մենք ուզում ենք, որպեսզի դուք մի քանի տարի հետ գաք այս դահլիճ արդեն բոլորովին այլ կարգավիճակով: Ցանկանում ենք, որպեսզի ձեզանով հպարտանան ոչ միայն ձեր ծնողները, այլ մեր ողջ ժողովուրդը, այնպես ինչպես ամեն տարի այս դահլիճում հավաքվում են գերազանց սովորողները, հանրապետական և միջազգային մրցույթներում հաղթողները: Մենք բոլորս հպարտանում ենք: Ուզում ենք՝ այստեղ եղած տղաներն ունենան առնվազն այնքան հաջողություն, ինչքան Հենրիխ Մխիթարյանը, Լևոն Արոնյանը: Ցանկանում ենք, որպեսզի դուք ապրեք խաղաղ երկնքի տակ, ձեր ծնողները շատ ավելի ժամանակ և հնարավորություն ունենան ձեր գիտելիքները, աշխարհայացքն ընդլայնելու համար:

Ուզում ենք, որ տղաներն առաջին հերթին պինդ լինեն, աղջիկներն էլ շատ հոգատար, որպեսզի նմանվեն իրենց մայրերին, տատիկներին, լինեն գեղեցիկ, կարգապահ, որ հեռու ապագայում ունենանք նաև ձեզ պես կարգապահ, գեղեցիկ երեխաներ:

Բոլորդ միասին  պետք է խոստանաք, որ դուք ուրախ եք լինելու:  Ուրախ պետք է լինեք, որ կարողանաք լավ գործեր կատարել: Իսկ մեր երկրի ապագան դուք եք ու ձեր հասակակիցները»,- շնորհավորական իր խոսքում ասաց նախագահ Սերժ Սարգսյանը:

Նշենք, որ Ամանորի և Սուրբ Ծննդյան տոների կապակցությամբ ՀՀ Նախագահի նստավայրում դեկտեմբերի 22-ից մեկնարկել են երեխաների համար անցկացվող ամենամյա տոնական միջոցառումներ: Դեկտեմբերի 22-ին Բաղրամյան 26-ում հյուրընկալվել էին հանրակրթական դպրոցների բարձր առաջադիմություն ցուցաբերած 300 երեխա, նախօրեին՝ ՀՀ ԶՈՒ զինծառայողների, Երկրապահ կամավորական միության անդամների, զոհված և հաշմանդամ ազատամարտիկների ընտանիքների երեխաներ և թոռնիկներ, այդ թվում՝ Լեռնային Ղարաբաղի Հանրապետությունից, ՀՀ ոստիկանության և ազգային անվտանգության ծառայության աշխատակիցների երեխաներ: Տոնական միջոցառումներին ամեն տարի մասնակցում են 6-12 տարեկան շուրջ 1000 երեխա մայրաքաղաքից, մարզերից, Արցախից: