Ձեր վստահելի աղբյուրը

Պաշտպանության նախկին փոխնախարար Վահան Շիրխանյանի պաշտպանությամբ զբաղվող փաստաբանները դեկտեմբերի 25-ին դիմելու են Վերաքննիչ դատարան` բողոքարկելու իրենց պաշտպանյալին կալանավորելու մասին դատարանի որոշումը: Այդ մասին Panorama.am-ին տեղեկացրեց Շիրխանյանի փաստաբան Ստեփան Ոսկանյանը:

«Որպես կասկածյալ ցուցմունք է տվել ու իրեն առաջադրված մեղադրանքը չի ընդունել: Հետագայում որպես մեղադրյալ հրաժարվել է ցուցմունք տալուց», -հավելեց փաստաբանը:

Դեռևս կալանավորելու մասին միջնորդության քննարկման ժամանակ, փաստաբանի խոսքով, պաշտպանական կողմը, հաշվի առնելով Շիրխանյանի առողջական խնդիրները, միջնորդել էին գոնե գրավով ազատ արձակել, սակայն դատարանը չէր բավարարել միջնորդությունը:

Անդրադառնալով այն տեղեկություններին, թե Վահան Շիրխանյանը ուղղություն է ցույց տվել Արթուր Վարդանյանի ղեկավարած զինված խմբին իրենց հետագա գործողություններն անելու համար, Ստեփան Ոսկանյանը նկատեց. «Եթե նա չի ընդունում իրեն առաջադրված մեղադրանքը, ինչպես կարող են նման լուրեր հայտնել: Համենայնդեպս ես նման որևէ փաստական տվյալ չեմ հանդիպել»:

Հետաքրքրվեցինք, թե Շիրխանյանը խմբի ո՞ր անդամի հետ է ծանոթ եղել, փաստաբանը պատասխանեց. «Ելնելով պարոն Շիրխանյանի ցուցմունքից, նա հայտնել է, որ ծանոթ է Արթուր Վարդանյանի հետ: Սակայն դա հիմք չէ, որ անձին մեղադրանք առաջադրվի»:

Մեր հարցին, թե նախաքննական մարմինն ինչի հիման վրա որոշեց կալանավորել Վահան Շիրխանյանին, Փաստաբանը պատասխանեց. «Ես ենթադրում եմ, որ կան ցուցմունքներ: Համենայնդեպս կալանքի ժամանակ դատարանում ներկայացված նյութերում չեմ հանդիպել որևէ ցուցմունք, որ որևէ անձի կողմից մատնանշված լինի Շիրխանյանի անունը, չնայած մեղադրանքի բնորոշումից նման բան երևում է»:

Նա նշեց, որ մոտ ժամանակները որոշակի քննչական գործողություններ կկատարվեն Շիրխանյանի հետ, որից հետո պաշտպանական կողմը կվերանայի իր անելիքները:

Շիրխանյանին առաջադրվել էր մեղադրանք ՀՀ քրեական օրենսգրքի 223-րդ հոդվածի 2-րդ մասի հատկանիշներով՝ Արթուր Վարդանյանի կողմից ստեղծված հանցավոր համագործակցությանը մասնակցելու, դրա օգտին գործելու, կոնկրետ հանձնառություն և դերակատարություն ունենալու համար:

Ըստ նախաքննական մարմնի, Նորք Մարաշում նոյեմբերի 25-ին վնասազերծված զինված խմբի, թիրախում եղել են քաղաքացիներ, իշխանության առանձին ճյուղեր, ու պետական մարմիններ: Այդ գործի շրջանաներում կալանավորվել են 2 տասնյակից ավելի անձինք, այդ թվում նաև` կանայք: