Ձեր վստահելի աղբյուրը

Առողջապահության նախարարության համար 2015 թվականը առանձնահատուկ տարի էր, քանի որ նախարարությունը որպես առաջնայնություն սահմանել էր հանրային առողջության ապահովման գործընթացը: Այս մասին այսօր տարեվերջյան ամփոփիչ ասուլիսում ասաց ՀՀ առողջապահության նախարար Արմեն Մուրադյանը:

«Պետությունն այսօր շեշտադրում է հանրային առողջապահության գերակայությունը։ Սա ենթադրում է երկրի բնակչությանն առաջին հերթին առողջ պահել, իսկ հիվանդության առկայության դեպքում` բարձրակարգ և մատչելի բժշկական ծառայություններ ապահովել։  Այս ճանապարհով են ընթանում աշխարհի ամենահարուստ և զարգացած երկրները»,- ասաց նախարարը:

Ա.Մուրադյանի խոսքերով՝ այս տարի հանրային առողջապահական ծրագրերում հաջողություններ են ունեցել պատվաստանյութերի մասով:

«Հաջողություններ ունեցանք Առողջապահության  համաշխարհային կազմակերպության կողմից Հայաստանում թույլատրված պատվաստանյութերի ներդրման ոլորտում: Այս տարի մենք անցում ենք կատարել ինչպես զորակոչային, այնպես էլ նախազորակոչային տարիքի անձանց պատվաստումների ծրագրին»,- նշեց Ա.Մուրադյանը՝ հավելելով, որ վերջին տարիներին նոր պատվաստանյութեր են ներդրվել Հայաստանում, ինչի ադյունքում 2.5 անգամ նվազել են մենինգիտների թիվը, 2,5-3 անգամ՝  մինչև հինգ տարեկան երեխաների շրջանում ռոտավիրուսների դեպքերը: 

Անդրադառնալով կենտրոնացված գնումներով անվճար տրամադրվող դեղերի բաշխմանը` նախարարը նշեց, որ անմիջապես արտադրող կազմակերպությունների հետ պայմանագրեր կնքելով նախարարությունը կարողացել է բարձրացնել դեղերով ապահովվածության մակարդակը շուրջ 80 տոկոսով՝ նախորդ տարիների 30 տոկոսի փոխարեն:  

Նախարարի խոսքերով՝ պետությունը ձգտում է հնարավորինս հեշտացնել շաքարային դիաբետով հիվանդների և առաջին հերթին հիվանդ երեխաների կյանքը։ Այդ նպատակով ՀՀ կառավարության որոշմամբ՝ շաքարային դիաբետով տառապող երեխաների կարիքների համար ձեռք են բերվել հատուկ գրիչ-ներարկիչներ, որոնք առավել հարմարավետ են և հիվանդներին թույլ կտան ունենալ օրվա առավել ճկուն ռեժիմ և սննդակարգ։

«Սա նաև երեխաներին խարանից ձերբազատելու հնարավորություն է: Այս գրիչների ձեռքբերումը համարում եմ ոչ թե շռայլություն, այլ՝ անհրաժեշտություն»,- նշեց նախարարը։

Առողջապահության նախարարը կարևորեց նաև 2015թ. մեկնարկած Համաշխարհային բանկի և ՀՀ կառավարության «Հիվանդությունների կանխարգելում և վերահսկում» ծրագրով ոչ վարակիչ հիվանդությունների (դիաբետի, հիպերթենզիայի և արգանդի պարանոցի քաղցկեղի) կանխարգելմանն ու վաղ հայտնաբերմանն ուղղված սկրինինգային համատեղ ծրագիրը` երեք տարվա ընթացքում բնակչության 50-60 տոկոս ընդգրկվածությամբ։ Ըստ նրա՝ հունվար-նոյեմբեր ամիսներին ծրագրի շրջանակում իրականացվել է ավելի քան 500 հազար հետազոտություն։

«Հայաստանում երբևէ նման ընդգրկվածությամբ սկրինինգային ծրագրեր չեն իրականացվել։ Արդյունքում, հիվանդացության ցուցանիշների աճ կարձանագրվի, սակայն դրա փոխարեն կնվազեն ուշացած դեպքերը և մահացությունը»,- ընդգծեց Արմեն Մուրադյանը:

Անդրադառնալով նախարարության բացթողումներին՝ նախարարն  առանձնացրեց հանրային առողջապահական ծրագրերի իրազեկվածության պակասը. «Այս աշխատանքները պետք է կրեին համընդհանուր բնույթ»:

Մինչ ասուլիսի մեկնարկը նախարարը հավաստագիր հանձնեց Pharma Tech ընկերությանը՝ նշելով, որ Հայաստանում 19 դեղագործական ընկերություններից երրորդն է, որ հավաստագիր է ստանում: