Ձեր վստահելի աղբյուրը

Տոնական օրերին ընդառաջ Սննդամթերքի անվտանգության ծառայության քար լռությունը զարմացրել է ոլորտի մասնագետներին:

«Այնպիսի տպավորություն է, որ պետական ապարատը ներսից փակել է դռները, որովհետև այնպիսի գործառույթ, որ հանրության հետ կապ ունի, մենք չենք տեսնում»,-Panorama.am-ի հետ զրույցում նման կարծիք հայտնեց «Իրազեկ և պաշտպանված սպառող» ՀԿ նախագահ Բաբկեն Պիպոյանը, հիշեցնելով, որ ոչ պարենային ապրանքների շուկայում վերահսկողություն իրականացնող կառույցի դռներն էլ պետականորեն փակել են դրսից:

Ըստ նրա, այս օրերին երկու կառույցներն էլ պետք է իրականացնեին  նախաձեռնողական քաղաքականություն, սպառողների իրազեկման արշավ: Մինչդեռ հիմա այդ գործին լծվել ու փորձում են բացը լրացնել  լրատվամիջոցներն ու առանձին կազմակերպություններ:

«Եթե ՍԱՊԾ-ն գոնե մի հայտարարությամբ հանդես գար, ապա տնտեսվարողները կիմանային, որ խնդիրները ծառայության ուշադրության շրջանակում են»,-ասաց ՀԿ նախագահը:

Նրա կարծիքով, այս օրերին ծառայությունը պետք է ուսումնասիրություններ իրականացներ խոշոր սուպերմակետներում, օպերատիվ կերպով քաղաքացիներին իրազեկեր հայտնաբերված խախտումների, հնարավոր վտանգների մասին:

Ասացինք՝ գուցե ծառայության աշխատակիցներն ամեն դեպքում իրականացնում են ուսումնասիրություններ, սակայն խախտումներ չեն հայտնաբերվում: Ի պատասխան Պիպոյանն ասաց.
«Գիտե՞ք, նման դեպքերում պետք է հայտարարություն լինի, ասեն՝ հանգիստ արեք ձեր առևտուրը»:

Նա նկատեց,  ԶԼՄ-ներում այս օրերին էլ լինում են հրապարակումներ, որոնք վերաբերում են սննդամթերքի արտադրության, վաճառքի իրականացման ոչ պատշաճ պայմանների առկայությանը: Նրա խոսքով, բավական է մի կամայական շրջայց սուպերմարկետում, փողոցում կամ սովորական խանութում, ու կտեսնենք բազմաթիվ խախտումներ:

«Այնպես չէ, որ խախտումներ չկան, բազմաթիվ տեղերում տարաբնույթ խախտումներ կան: Եթե անգամ ստուգում եղել է, ու խախտում չի հայտնաբերվել, դա նշանակում է, որ լավ չի ստուգվել: Ես ավելի հակված եմ կարծել, որ  ըստ էության որևէ առարկայական գործողություն չի իրականացվել առնվազն տոնական օրերին: Այս տարին այդ առումով բացառիկ է: Նման փորձ 2011-ից ի վեր չի եղել: Ամեն տարի նախատոնական օրերին պետական ապարատը հրապարակել է ուսումնասիրության արդյունքները, գոնե տարին է ամփոփել, անգամ տարվա ամփոփում չկա: Ծառայությունը գործում է հասարակությունից կտրված: Մենք պետք է զգոն լինենք»:

ՀԿ նախագահն այդ աշխատանքում հիշեցրեց կարևորը.  կա երեք փուլ՝ ռիսկի գնահատում, կառավարում, հաղորդակցում, որոնք համահավասար կարևորություն ունեն:

«Ռիկսի գնահատում չկա, հաղորդակցություն, տեսնում ենք, չկա, իսկ կառավարումն արդեն հարցի 8-րդ կողմն է,  բազմիցս  քննարկել ենք, թե ինչ սխալ ուղու վրա է եղել կառավարումը»,-ասաց նա:

Փորձելով լրացնել ծառայության աշխատանքի հետևանքով առաջացած բացը, սպառողների իրավունքերի պաշտպանությամբ զբաղվող կազմակերպության նախագահը քաղաքացիներին  խորհուրդ է տալիս արդեն գնված ու պատրաստված սննդամթերքը պահպանել սառնարանային պայմաններում:

«Կենդանական ծագման հումքին ու մթերքին պետք է առանձնահատուկ ուշադրություն դարձնել, միս-մսամթերքի, կաթ-կաթնամթերքի, կրեմային հրուշակեղենի պիտանելության ժամկետներին ու պահպանման պայմաններին ոչ միայն իրացման ցանցում, այլև մեր տներում, որովհետև մենք մի քանի օրվա մթերք են պահեստավորում ու հաճախ տանը սառնարանային պայմաններ չենք կարողանում ապահովել այդ  մթերքների համար»,-ասաց ՀԿ նախագահը, հիշեցնելով, որ մթերքի մակնշման մեջ  գրված է, թե  ինչ ջերմաստիճանային պայմաններում պետք է դրանք պահվեն:

Պիպոյանը տնային տնեսուհիներին հորդորում է, որ երեկոյան ժամերին մսամթերքը տեղափոխեն սառ վայր. «Հասկանում եմ, որ հոգնած եք, լարված,  բայց մսամթերքը անպայման տեղափոխեք սառը տեղ, դա մի քանի ժամով կերկարացնի նրա «կյանքը»»:

Նա խորհուրդ է  տալիս ամանորյա աղցաններում հավկիթ չլցնել, իսկ եթե, այնուամենայնիվ, լցրել եք, ապա պահել ընդամենը մեկ օր. «Կարելի է հավկիթը, մայոնեզն ու թթվասերը ավելացնել մատուցելուց առաջ փոքր չափաբաժնի վրա»: