Ձեր վստահելի աղբյուրը

Ընտանիքի համար կա՞ ավելի մեծ երջանկություն, քան երեխայի ծնունդը, հատկապես, երբ ծնունդը նշանավորվում է ոչ թե մեկ, այլ միանգամից երեք երեխաներով: Ահա այսպիսի հրաշք տեղի ունեցավ սահմանամերձ Ոսկեվան գյուղում բնակվող Բարսեղյանների ընտանիքում: Այս տարի նրանց ընտանիքը համալրվեց 3 նոր անդամով: Երևույթն իր տեսակով բացառիկ է, քանի որ մայրը  հղիացել է առանց որևէ բժշկական միջամտության. բազմապտուղ հղիություն, սովորաբար լինում է արտամարմնային բեղմնավորման ճանապարհով:

Երեխաների մայրը 25 տարեկան է, սա նրա երկրորդ հղիությունն էր: Ավագ որդին՝ Արարատը, արդեն 5 տարեկան է: Հենց նա է ընտրել եղբայրների անունները՝ Վահե, Վաչե և Արամե:

Panorama.am-ը զրուցել է բազմազավակ մայրիկի՝ Անժելա Մնացականյանի հետ: Երիտասարդ ուսուցչուհին մեծ ոգևորությամբ պատմեց չորս զավակների խենթությունների, 5-ամյա Արարատի ամանորյա ցանկությունների և իր երջանիկ ընտանիքի մասին:

«Վահեն, Վաչեն և Արամեն արդեն 10 ամսական են, հանել են առաջին ատամիկները»,- պատմում է Անժելան:

Երեխաները ոչ միայն երջանկություն են պարգևել ծնողներին, այլև ամենօրյա հոգս և պատասխանատվություն:

«Չնայած դժվարություններին, ֆինանսական խնդիրներին, մենք աշխարհի ամենաերջանիկ ընտանիքն ենք»,- ասում է Անժելան:

Նա նշեց, որ  իր ավագ որդին՝ Արարատը կարծես կանխազգացել էր եղբայրների ծնունդը:

«2014թ. հունիսի 1-ին ՀՀ նախագահ Սերժ Սարգսյանը  մասնակցեց Ոսկեվանի մանկապարտեզի բացմանը, ուր տեսնելով Արարատին՝  հարցրել է, թե նա քույր  կամ եղբայր ունի՞: Արարատը, կարծես կանխազգալով՝ ասել է, որ 3 եղբայր ունի: Նախագահը հետաքրքվել է գյուղապետից, թե իսկապես Արարատը երեք եղբայր ունի, սակայն գյուղապետը հերքել է: Դրանից մեկ ամիս անց պարզվեց, որ հղի եմ, իսկ հետո հետազոտությունը հաստատեց, որ եռյակ եմ ունենալու»,- նշում է Անժելան: 

Ընտանիքն ունի ֆինանսական դժվարություններ: Աշխատում է Անժելայի ամուսինը և սկեսուրը, ով մանկավարժ է:

Երիտասարդ մայրիկի խոսքերով՝ այս ամիսների ընթացքում տարբեր մարդկանցից օգնություն են ստացել: ՀՀ առողջապահության նախարարության մոր և մանկան առողջության պահպանման վարչության պետ Կարինե Սարիբեկյանի  աջակցությամբ էլ 6 ամիս կաթնախառնուրդ են ստացել: 

«Դա կարևոր աջակցություն է, քանի որ ամենամեծը սնունդի խնդիրն է, իսկ հագուստով շատ են օգնում»,- ասում է նա:

Նշենք, որ ընտանիքը նպաստ չի ստանում՝ պատճառը, ըստ Անժելայի, սեփականաշնորհված հողն է. «Ասում են սեփականաշնորհված հող ունեք, դրա համար նպաստ չեն տալիս: Բայց բնական է, որ այդ հողից երեխաները չեն օգտվում, քանի որ այն գտնվում է հակառակորդի սահմանին մոտ և չի մշակվում»:

Անժելան պատմում է, որ վերջին շրջանում հակառակորդի կրակոցները շատացել են, օրեր առաջ կրկին գյուղի վրա կրակել են. չորս զավակների մայրը տագնապը սրտում ապրում է Ոսկեվանում:

«Ամուսինս, սկեսրայրս ասում են, որ երբեք գյուղը չեն թողնի, եթե իրենք գնան, ապա ո՞վ է իրենց գյուղը պաշտպանելու: Ես համաձայն եմ՝ եթե ամուսինս, հետո էլ իմ երեխաները թողնեն հեռանան, ապա էլ ով պետք է մեր հայրենիքը պաշտպանի: Պարզապես պետությունն էլ պետք է մի քիչ օգնի, որ կարողանամ  մեծացնել երեխաներիս»,- ասաց նա:

Նրա խոսքերով՝ պետությունը երեխաներին հասանելիք ծննդյան միանվագ 1.5 միլիոն դրամը տրամադրել է, սակայն մյուս 1.5 մլն դրամը չեն կարողանում բանկից հանել, դա ընտանեկան դրամագլուխ է: Սակայն Անժելան մտածում է՝ պետք է բացառություններ լինեն, որպեսզի բազմազավակ ընտանիքները կարողանան այդ գումարը տնօրինեն՝ ընտանեկան հոգսերը քիչ թե շատ թեթևացնելու համար: 

«Գոյություն ունի պետական օժանդակության ծրագիր՝ նոր ծնված երեխաների աջակցության համար: Սոցիալական ծառայության միջոցով մենք արդեն ստացել ենք այդ աջակցությունը: Բայց եթե նկատի ունենանք, որ բազմանդամ ընտանիքների առօրյա ծախսերը շատ մեծ են, ուստի պետական աջակցության միանվագ օգնությունը կարող է բավարարել միայն կարճ ժամանակ: Դա հաշվի առնելով՝ ցանկալի կլիներ, որ մեր պետությունը ուշադրության կենտրոնում պահեր երիտասարդ և բազմանդամ ընտանիքների աջակցությունը»,- ասաց նա:

Ամանորն ու 5-ամյա Արարատի ցանկությունը

Բարսեղյանների տանն արդեն տիրում է տոնական  տրամադրություն: Անժելան, նրա ամուսինն ու 5-ամյա Արարատն արդեն տոնածառը զարդարել են: Փոքրիկները թեև 10 ամսական են, սակայն ուրախացել են՝ տեսնելով տոնածառը:

Արարատը ձմեռ պապիկին նամակ է գրել ու զինվորական համազգեստ խնդրել, իսկ եղբայրներին՝ շատ խաղալիքներ:

«Արարատի համար իր եղբայրներն աշխարհ են: Վահեն, Վաչեն ու Արամեն էլ Արարատին են շատ սիրում: Փոքրերը սիրում են իրար քաշքշել, ծիծաղեցնել, իսկ երբ մանկապարտեզից տուն է գալիս Արարատը, եղբայրները քաշում են նրան,  մոտները նստեցնում ու սկսում համբուրել»,- ծիծաղելով պատմում է բազմազավակ մայրիկը:

Անժելայի խոսքերով՝ Արարատը փորձում է մայրիկի հոգսերը թեթևացնել՝ եղբայրների հետ խաղալով, սակայն երիտասարդ մայրիկի առաջին օգնականը նրա սկեսուրն ու սկեսրայրն են. «Սկեսուրիս ու սկեսրայրիս նման նվիրված տատիկ-պապիկ չեմ պատկերացնում: Նրանք իրենց քնի, իրենց հանգստի հաշվին փորձում են թեթևացնել մեր հոգսը»:

Տանտիկիններն արդեն ամանորյա եռուզեռի մեջ են: Անժելան խոստովանոմ է, որ քնի հաշվին ինքն ու սկեսուրը փորձում են ամեն ինչ հասցնել. «Ամանորին պատրաստվում ենք, երեխաներին քնեցնելուց հետո ես ու սկեսուրս գիշերը տան մաքրություն ենք արել, բլինչիկն արդեն արել ենք, մեկ խոզ ունեինք, դա էլ մորթել ենք ու արդեն պատրաստ ենք դիմավորել Նոր Տարին: Փառք Աստծո, այս տարին մեր տարին էր, Աստված մեզ մեծ, անսահման երջանկություն պարգևեց: Երեխաների ծնունդից հետո Վաչեի քաշը թեթև էր, բժիշկներն ասում էին, որ հնարավոր է խնդիրներ լինեն, բայց փառք Աստծո, ամեն ինչ նորմալ է, երեքի հետ առողջ տուն եկանք: Դրանից մեծ երջանկություն ինձ համար գոյություն չունի»:

Անգամ գնդակոծությունը չի խաթարում այս ընտանիքի երջանկությունը:

«Մեր դարպասներից ներս մտնելուց հետո կրակոցների ձայները մնում են դրսում, իսկ ներսում՝ ուրախություն է: Երեկոյան էլ մեծ ու փոքր Արարատները յարխուշտա են պարում, փոքրերն էլ արդեն սովորել են՝ թաթիկները բարձրացնում են ու պարում: Նման երջանկություն, ուրախություն ցանկանում եմ բոլոր ընտանիքիներին»,- ասում է Անժելան: