Ձեր վստահելի աղբյուրը

«Այս պահին կա ութ հիվանդ, որոնք միացված են արհեստական շնչառության սարքին»,- այս մասին նշել է առողջապահության նախարար Արմեն Մուրադյանը՝ «Սուրբ Գրիգոր Լուսավորիչ», «Էրեբունի», «Նաիրի» բժշկական կենտրոններ, «Մուրացան» հիվանդանոցային համալիր  և «Հերացի» թիվ 1 համալսարանական հիվանդանոց կատարած համայցերի ժամանակ:

ԱՆ մամուլի ծառայությունից հայտնում են, որ նախարարին ներկայացվեց տարբեր բժշկական կազմակերպությունների վերակենդանացման բաժանմունքներում բուժվող ծանր հիվանդների առողջական վիճակը,  առաջատար մասնագետների հետ քննարկվել  նրանց բուժման հետագա  ռազմավարությունը:

Նախարարը տեղեկացրել է, որ արագ արձագանքման խմբի աշխատանքների և  վերլուծության արդյունքների մասին ամեն օր պարբերաբար զեկուցվում է ՀՀ վարչապետին:

Արմեն Մուրադյանը նշել է, որ բոլոր հաստատություններն ապահովված են  անհրաժեշտ  դեղերով և բժշկական պարագաներով: ՀՀ առողջապահության նախարարը ևս մեկ անգամ կոչ է արել բնակչությանը վաղ փուլում  դիմել բժշկի, չսպասել,  որ հիվանդությունը բարդանա և չզբաղվել ինքնաբուժմամբ:

Նախարարի  խոսքով` նախընտրելի է ունենալ հիվանդների մեծ ծավալ, բայց  դիմելիությունը գրանցվի  հիվանդության առավել վաղ փուլերում:

Համայցը եզրափակվել է «Արմենիա» հանրապետական բժշկական կենտրոն  և Վերարտադրողական առողջության, պերինատալոգիայի, մանկաբարձության և գինեկոլոգիայի հանրապետական ինստիտուտ այցելությամբ: