Ձեր վստահելի աղբյուրը

Ուրախալի է, որ Համաշխարհային բանկի կանխատեսումը՝  կապված Հայաստանի տնտեսական աճի հետ, համընկնում է 2016թ-ի բյուջեով կանխատեսված աճին՝ ՀՆԱ-ի 2.2%: Այս մասին այսօր լրագրողների հետ հանդիպման ժամանակ ասաց  ԱԺ ՀՀԿ խմբակցության անդամ, ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը:

Սակայն, ըստ նրա, տնտեսական առումով կան անորոշություններ, որոնք հիմնականում պայմանավորված են  քաղաքական դրդապատճառներով:

«Ցավոք, այդ անորոշությունները գնալով խորանում են: Շարունակվում են տնտեսական սանկցիաները մեր հիմնական գործընկերոջ՝ ՌԴ-ի նկատմամբ, ռուբլին արժեզրկվում է, նավթի գնի անկումը շարունակվում է, որն այս պահին արդեն 32,5 դոլար է՝ մեկ բարելի դիմաց: Սրանք լրացուցիչ մարտահրավերներ են մեզ համար»,- ասաց Գ.Մինասյանը:

Բացի այդ, ըստ նրա, Հայաստանի համար լրացուցիչ մարտահրավեր է նաև հարևան պետության՝ Իրանի նկատմամբ պատժամիջոցները, որոնք կիրառում է Սաուդյան Արաբիան:

Ինչ վերաբերում է Ադրբեջանին, ապա այստեղ իրավիճակը հայտնի է. «Նավթի գների անկումը բարդ ֆինանսական վիճակի է բերել և կանխատեսումների համաձայն՝ այդ  իրավիճակը խորանալու է: Տնտեսագետներն ասում են, որ նավթի գինը կհասնի մինչև 20 դոլարի: Ուստի Ադրբեջանում տնտեսական իրավիճակը գնալով խորանալու է, ինչի հետևանքով այդ երկրի իշխանությունները հասարակության ուշադրությունը ներքին խնդիրներից շեղելու համար կփորձեն Հայաստանի և ԼՂՀ-ի սահմաններին լարվածությունը խորացնել»:

Գագիկ Մինասյանը նաև հավելեց, որ Ադրբեջանի նման գործելաոճն ավելի կբարդացնի մեր տնտեսական ակնկալիքների իրականացումը հատկապես ներդրումների առումով:

Պատգամավորը ստեղծված բարդ իրավիճակում կարևորում է այն հիմնական ուղղությունների նախանշումը, որը թույլ կտա Հայաստանին իրականացնել այն տնտեսական ծրագրերը, որոնք նախատեսված են: Գագիկ Մինասյանն այս ուղղությամբ առաջին կարևոր քայլը համարում է բարեփոխված Սահմանադրությունը, որի շրջանակում մի քանի օրենքներ ընդունվել են և դեռ կընդունվեն, որոնք հասարակության մոտ կառաջացնեն դրական ազդակներ:

Նա անդրադարձավ նաև  մարտահրավերների դիմակայմանը՝ նշելով, որ  առաջին հերթին կարևորում  է կոռուպցիայի դեմ պայքարի ակտիվացումը. «Կոռուպցիայի ցածր մակարդակ ունեցող երկրներում տնտեսական ակտիվությունը միշտ ավելի բարձր է, ուստի մենք պետք է մարտահրավերներին դիմակայալու համար ավելի ակտիվ պայքարենք»:

Բացի այդ, ըստ նրա, հավասար մրցակցային պայմաների համար ավելի բարենպաստ պայմաններ պետք է ստեղծել։ Նրա խոսքերով՝ պետք է դիվերսիֆիկացնել արտահանման հնարավորությունները:

Հարցին, թե դոլարի արժևորումը դրամի նկատմամբ հնարավո՞ր է հանգեցնի գնաճի, Գ.Մինասյանն ասաց, որ դա միտում է, որը պայմանավորված է դոլարի ուժեղացմամբ բոլոր մնացած արժույթների նկատմամբ:

«Ինչ վերաբերում է գնաճին, նախորդ տարվա ընթացքում, տարին ավարտեցինք մեղմ գնաճով, կարծում եմ՝ այս տարի գնաճային ճնշումները կլինեն ոչ ավելի, որքան նախատեսված է պետական բյուջեի նախագծով»,-ասաց նա: