ԱՄՆ կոնգրեսականը շարունակում է Ղարաբաղում խաղաղության հաստատմանն ուղղված ջանքերը. Ամերիկայի ձայն

Քաղաքական 15:09 12/01/2016

ԱՄՆ կոնգրեսականը շարունակում է Ղարաբաղում խաղաղության հաստատմանն ուղղված ջանքերը. Ամերիկայի ձայն

Միացյալ Նահանգները փորձում է նվազեցնել լարվածությունը Ղարաբաղյան հակամարտության շրջանում: Այս մասին «Ամերիկայի ձայն»-ի փոխանցմամբ , նշել է Կոնգրեսի Ներկայացուցիչների պալատի արտաքին հարաբերությունների հանձնաժողովի նախագահ Էդ Ռոյսը:

Ինչպես հաղորդվում է, կոնգրեսականը նման հայտարարությամբ է հանդես եկել Ամերիկյան ձեռնարկատիրության հաստատության կողմից կազմակերպված քննարկման ընթացքում, իսկ նախորդ շաբաթ էլ կոնգրեսականի նախաձեռնությամբ Արտաքին հարաբերությունների հանձնաժողովը Լեռնային Ղարաբաղի խնդրի կարգավորմանը նվիրված դռնփակ քննարկում էր կազմակերպել՝ ԵԱՀԿ-ի Մինսկի խմբի ԱՄՆ-ի համանախագահ Ջեյմս Ուորլիքի մասնակցությամբ:

Աղբյուրը հիշեցնում է, որ ավելի վաղ Էդ Ռոյսը և հանձնաժողովի դեմոկրատական փոխնախագահ Էլիոթ Էնգելը Պետքարտուղարություն նամակ էին հղել ղարաբաղյան խնդրի կարգավորման վերաբերյալ, որին միացել էր 85 կոնգրեսական:

«Էլիոթ Էնգելն ու ես փորձում ենք «իջեցնել ջերմաստիճանն» այս տարածաշրջանում», - նշել է Ռոյսը:

Կոնգրեսականի խոսքով, խաղաղության ապահովման և բռնություններին վերջ տալու համար անհրաժեշտ է հայ-ադրբեջանական սահմանում և ղարաբաղյան շփման գծում տեղադրել կրակոցների ուղղությունը որսացող սարքեր, միջազգային դիտորդներ կցել և պահանջել բոլոր կողմերից դիպուկահարներին հետ քաշել սահմանից և շփման գծից:

«Եթե այդ երեք պահանջներն իրագործվեն, ապա, անկախ փորձագետների և Պենտագոնի կարծիքով դա կբերի շատ ավելի ապահով իրավիճակի: Այնպես որ, մենք առաջ ենք քաշում այս երեք պահանջները», - նշել է Էդ Ռոյսը:

Ավելի վաղ ԱՄՆ Պետքարտուղարության ներկայացուցիչ Ջոն Քիրբին հայտարարել էր, որ ԱՄՆ-ն շարունակում է հավատարիմ մնալ ԼՂ հակամարտության խաղաղ կարգավորմանը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: