Ձեր վստահելի աղբյուրը

Ռուսական վերլուծական կայքերի կանխատեսմամբ՝ Իրանի և Սաուդյան Արաբիայի միջև պատերազմը նավթի գինը կբարձրացնի մինչև 250 դոլար: Իրան-Սաուդյան Արաբիա հարաբերություններում առաջած լարվածության, զինված հակամարտության հավանականության վերաբերյալ Panorama.am-ը զրուցել է իրանագետ Արմեն Իսրայելյանի հետ:

-Որքանո՞վ է հավանական, որ գերտերությունները, որոնք նավթի գնի հետ խնդիրներ ունեն, Իրանի և Սաուդյան Արաբիայի միջև պատերազմ հրահրեն:
-Ներկա պայմաններում շատ քիչ է պատերազմի հավանականությունը, քանի որ տվյալ պահին այն չի բխում ինչպես հակամարտող երկրների, այնպես էլ Միացյալ Նահանգների շահերից: Թերևս միակ շահագրգիռ կողմը կարող են համարվել Թուրքիան ու Իսրայելը:
Սաուդյան Արաբիայի նպատակը ոչ թե Իրանի հետ պատերազմելն է, այլ միջուկային համաձայնության խափանումը, որի ամբողջական գործարկումից հետո Արևմուտքն արաբական երկրներում ներդրումներ կատարելու փոխարեն՝ կսկսի ներդրումներ կատարել Իրանում: Այդ հանգամանքը չէր կարող չանհանգստացնել տարածաշրջանում Իրանի մրցակից Սաուդյան Արաբիային:

Ահա այս պայմաններում, երբ Սաուդյան Արաբիայի բյուջեի զգալի մասը կախված է նավթի վաճառքից, ապա նավթի գների անկման պայմաններում վերջինիս տնտեսությունը լուրջ վնասներ կկրի, որը կթուլացնի նաև տարածաշրջանում ունեցած իր ազդեցությունը: Ի դեպ, Ռոհանին օրերս հայտարարեց, որ այս տարվա բյուջեի կախվածությունը նավթից 25 տոկոս է:  
Ինչ վերաբերում է Իրանին, ապա Հասան Ռոհանիի կառավարությունը խնդիր ունի պահել վերջին երկու տարվա ընթացքում միջուկային հարցում ձեռք բերված հաջողություններն ու հետամուտ լինել տնտեսական պատժամիջոցների վերջնական վերացմանը, հետևաբար պատերազմը կարող է խաթարել միջուկային համաձայնության կատարման ընթացքը:
Բացի այդ՝ Պարսից ծոցում նախօրեին ամերիկացի զինվորականների ձերբակալությունն ու կարճ ժամանակ անց նրանց ազատ արձակման փաստը ցույց տվեց, որ Միացյալ Նահանգները ևս հակված չեն միջուկային համաձայնության գործարկման նախաշեմին լարել Իրանի հետ հարաբերությունները:   

-Ւրան-Սաուդյան Արաբիա հարաբերությունների սրումը ի՞նչ կտա Ռուսաստանին:
-Թեև Մոսկվան պաշտոնապես հայտարարել է, որ Սաուդյան Արաբիային և Իրանին հաշտեցնելու նպատակով պատրաստ է միջնորդել, այնուամենայնիվ Ռուսաստանը մեծ հաշվով դեմ չի լինի Թեհրանի և Ռիադի հարաբերությունների սրմանը մի քանի պատճառով:
Առաջին. զգալիորեն կնվազի ռուս-թուրքական հարաբերություններում առաջացած ճգնաժամի վրա ուշադրությունը: Այս ընթացքում Մոսկվան և Անկարան գուցե տարածաշրջանային մի շարք հարցերի շուրջ գան որոշակի պայմանավորվածության: Երկրորդ, Իրան-Սաուդյան Արաբիա հակամարտության դեպքում Իրանի միջուկային համաձայնությունը կխաթարվի, հետևաբար կնվազի նաև Իրան-Արևմուտք հարաբերությունների կարգավորման հավանականությունը: