Ձեր վստահելի աղբյուրը

«Նախորդ տարեվերջին զինված խմբի վերաբերյալ քրեական գործով ձերբակալված երկու ազատամարտիկներ` Խաչիկ Ավետիսյանը և Վլադմիր Առաքելյանը լավ մարդիկ են, ազնվագույն կերպարներղ»,- լրագրողների հետ հանդիպմանը հայտարարեց հասարակական-քաղաքական գործիչ, «Ղարաբաղ» կոմիտեի նախկին անդամ Աշոտ Մանուչարյանը:

«Նրանք ազնվագույն մարդիկ են, մեծագույն հերոսություններ են կատարել պատերազմի ժամանակ: Իսկ այսօր ձերբակալված քաղաքական գործիչ Գառնիկ Մարգարյանին գիտեմ որպես անարդարության դեմ պայքարող: Նրանք երեքն էլ, վստահաբար ասում եմ, որ իրենք չեն նախաձեռնել` գնանք տապալենք իշխանությունը, որովհետև նրանք գիտեն, որ երկիրն այնպիսի վիճակում է, որ պետք չէ ցնցումներ առաջացնել», -հավելեց Մանուչարյանը:

Նրա խոսքով, զինված խմբի հայտնաբերման և դրա հետ կապված ձերբակալությունների առումով «շատ զարմանալի բաներ» են կատարվում:

«Նախ տարօրինակ էր այդ արտահոսքը, թե ի սկզբանե խումբը եղել է հատուկ ծառայությունների ուշադրության կենտրոնում: Իշանությունները այնպիսի իրավիճակ են ստեղծել, որ դրանից դուրս գալու բոլոր օրինական ճանապարհները սպառվել են ու ելքը նման գործողություններն են», -հայտարարեց Մանուչարյանը:

Գործիչը կարծում է, որ դեռ հայտնի չէ` ով է սադրել, ինչ է եղել ու սկսել են կալանավորել նրանց, ում հետ խմբի անդամները երբևէ խոսել են: Նրա եզրակացությունը մեկն է` «Հայաստանի իշխանությունները այս գործով առաջնորդվում են արտաքին թելադրանքով»:

«Մենք կարող ենք սա համարել հերթական կալանքներից մեկը, եթե չլիներ նման գերվտանգավոր վիճակը: Ինչ է պետք անել այս ստեղծված իրավիճակում: Նախ Սերժ Սարգսյանը պարտավոր է անհապաղ կասեցնել այս անհեթեթ գործընթացը, այս անհեթեթ հետապնդումները, որոնք միայն մեծացնում են լարվածությունը», -հավելեց նա` նկատելով, որ երբ արտաքին կառավարում է իրականացվում, հնարավոր չէ ասել, թե ինչու են հենց նրանք հայտնվել թիրախում:

Ըստ Մանուչարյանի, հասկանալի է` նոյեմբերին ձերբակալված ու կալանավորված խմբի անդամների մոտ զենք հայտնաբերվել է, բայց Առաքելյանի, Մարգարյանի ու Խաչիկ Ավետիսյանի մոտ զենք չի եղել:

Հիշեցնենք` Արթուր Վարդանյանի ղեկավարած զինված խմբի գործով այսօր ձերբակալվել են «Հայրենիք և պատիվ» կուսակցության նախագահ Գառնիկ Գևորգի Մարգարյանը և «Եղվարդի մարզակոշիկների ֆաբրիկա» ԲԲ ընկերության հիմնական բաժնետեր Վլադիմիր Փայլակի Առաքելյանը:

Ըստ պաշտոնական հաղորդագրության, նրանք կասկածվում են՝ Արթուր Վարդանյանի կողմից ստեղծված հանցավոր համագործակցությանը մասնակցելու,  կազմակերպված խմբի կազմում  զենք և ռազմամթերք իրացնելու, պահելու մեջ,  նախատեսված՝ ՀՀ քրեական օրենսգրքի   223-րդ հոդվածի 2-րդ մասով  և 235-րդ հոդվածի  3-րդ մասով:

Նաև տեղեկացրել էին, որ ձերբակալվածների բնակարաններում  և «Եղվարդի մարզակոշիկների ֆաբրիկա» ԲԲ ընկերությունում  իրականացվել են խուզարկություններ, ձեռնարկվում են բոլոր անհրաժեշտ միջոցառումները  գործի լրիվությունը, բազմակողմանիությունը  և օբյեկտիվությունն ապահովելու համար: