Ձեր վստահելի աղբյուրը

H1N1 վիրուսի վերաբերյալ ոչ թե պետք է խուճապ բարձրացնել, այլ իմանալ, ինչպես պայքարել: Այս մասին այսօր լրագրողների հետ հանդիպմանն ասաց Առողջապահության նախարարության գլխավոր թոքաբան Անդրանիկ Ոսկանյանը:

«Որպեսզի համաճարակ լինի, պետք է բնակչության 5 տոկոսը վարակված լինի տվյալ հիվանդությամբ:  Գրիպը վիրուսային հիվանդություն է, որն ունի սահմանափակում և որի մեջ մտնում են A, B, C  խմբերը»,-ասաց թոքաբանը:

Նա նշեց, որ հիվանդությունը տարածվում է միայն հիվանդ մարդու միջոցով, վիրուսը ունակություն ունի մարդուց դուրս ապրելու մոտ 6 ժամ:

Ըստ մասնագետի՝ հիվանդից դուրս եկած վիրուսը մյուսներին չանցնելու համար պետք է իրականացնել պրոֆիլակտիկ միջոցներ:

«Հիվանդի համար պարտադիր է անկողնային ռեժիմը: Պետք է մեկուսացնել ընտանիքի անդամներից, սենյակը օրական 2-3 անգամ պետք է օդափոխել, սենյակի իրերը մի քանի անգամ մաքրել խոնավ շորով, օգտագործել հեղուկներ և չզբաղվել ինքնաբուժությամբ»,-խորհորդ տվեց  թոքաբանը՝ ընդգծելով, որ սրանք իրականացնելուց հետո պետք է անպայման  դիմել բժշկի:

Անդրանիկ Ոսկանյանը նկատեց, որ հաճախ հարբուխը շփոթում են գրիպի հետ. «Հարբուխը հիվանդություն չէ, այն կարող է լինել փռշտոցի, հազի տեսքով, որը կարող է առաջանալ նույնիսկ սոխ ուտելու հետևանքով»: