Ձեր վստահելի աղբյուրը

«Սառույցի թագավորները» համերգային ծրագիր, որը Հայաստանում պետք է անցկացվեր նախորդ տարվա նոյեմբերի  20-ին, բայց հետաձգվեց, հայ հանդիսատեսին ներկայացվելու է նոր ձևաչափով: Շոուի կազմակերպիչ «Ֆորպոստարտ» պրոդաքշնը տեղեկացնում է, որ երևանյան սառցե շոուի ընթացքում ելույթ է ունենալու նաև ռուս հայտնի երգիչ Դիմա Բիլանը:

«Սառույցի թագավորները» սառցե շոուն կայանալու է մարտի 5-ին Կ. Դեմիրճյանի անվան մարզահամերգային համալիրում:

«Սառույցի թագավորները» շոուին մասնակցելու են օլիմպիական չեմպիոնների, աշխարհի և Եվրոպայի առաջնությունների մրցանակակիրներ: Նախագիծը միավորել է տարբեր ուղղությունների ամենաբարձրակարգ պորֆեսիոնալ գեղասահորդների, ովքեր համաշխարհային հռչակ են ձեռք բերել: Ներկաները ականատես կլինեն պրոդյուսեր Արի Զաքարյանի կողմից հատուկ հայ հանդիսատեսի  համար ստեղծված ներկայացմանը:  Հանդես կգան Եվգենի Պլյուշչենկոն, Իրինա Սլուցկայան, Բրիան Ժուբերը, Տոմաշ Վերները, Գև Մանուկյանը և ուրիշներ:

Ծրագրում ընդգրկված են Դիմա Բիլանի ելույթը և կրկնակի օլիմպիական չեմպիոն Եվգենի Պլյուշչենկոյի պարային ամենավառ կատարումները:

Եվգենի Պլյուշչենկոյի ելույթը կուղեկցվի շոուի հատուկ հյուր՝ էստրադային ջութակահար, երգահան, պրոդյուսեր, դերասան Էդգար Հակոբյանի նվագակցությամբ:

Հիշեցնենք, որ 2015-ի նոյեմբերի  20-ին նախատեսված «Սառույցի թագավորները» համերգային ծրագիրը հետաձգվել էր, քանի որ ծրագրում ընդգրկված  Ֆրանսիայի Հանրապետության քաղաքացիներ Բրայն Ժուբերը, Մարի-Պյեր Լերեն և Գիոնի Սոբատերը չէին կարող ելույթ ունենալ. նոյեմբերի 13-ի երեկոյան Ֆրանսիայի մայրաքաղաք Փարիզում տեղի էին ունեցած ահաբեկչությունների, Ֆրանսիայի համար այս ծանր օրերին նրանք չէին կարող  բեմ դուրս գալ: