Ձեր վստահելի աղբյուրը

Այսօր նշվում է «The Beatles»-ի համաշխարհային օրը  (World Beatles Day): Նման որոշում 2001-ին կայացրեց ՅՈՒՆԵՍԿՕ-ն:

1957 թվականի հենց այս օրը Լիվերպուլում բացվեց «The Cavern» ակումբը, որտեղից սկսեց իր ճանապարհը դեռ այն ժամանակ ոչ հայտնի լեգենդար քառյակը Լիվերպուլից՝  Ջոն Լենոնը (ռիթմ-կիթառ, սոլո-կիթառ, բաս-կիթառ, ստեղնաշար, փողային գործիքներ, հարվածային գործիքներ, վոկալ), Փոլ Մաքքարթնին (բաս-կիթառ, ստեղնաշար, հարվածային գործիքներ, կիթառ, վոկալ), Ջորջ Հարրիսոնը (սոլո-կիթառ, ռիթմ-կիթառ, կիթառ, ստեղնաշար, հարվածային գործիքներ, վոկալ),  Ռինգո Սթարը (հարվածային գործիքներ, ստեղնաշար, վոկալ):

Խմբի առաջին համերգը «The Cavern» ակումբում կայացել է 1961 թ. փետրվարի 9-ին:

Այս կազմով նրանք աշխատեցին 8 տարի` թողարկելով 13 ալբոմ:

Տարբեր ժամանակներում խմբի կազմում են եղել Փիթ Բեստը (հարվածային գործիքներ, վոկալ), Ստյուարտ Սատկլիֆը (բաս-կիթառ, վոկալ) և Ջիմի Նիկոլը (հարվածային գործիքներ)։

«Ոչինչ ինձ չէր հուզել մինչ այն օրը, երբ ես լսեցի Էլվիսին (Էլվիս Փրեսլի). եթե չլիներ Էլվիսը, չէր լինի և Բիթլզը»,- ասել է  Ջոն Լենոնը:

 «The Beatles»-ի  ստեղծագործությունների մեծամասնությունը ստեղծված են համահեղինակային ու ստորագրված Ջոն Լենոնի և Փոլ Մաքքարթնիի անուններով։

«The Beatles»-ի ալբոմն ԱՄՆ-ում 19 անգամ ճանաչվեց պլատինե։ Խումբը նվաճել է Գրեմի 7 մրցանակ։

 Ըստ Rolling Stone ամսագրի՝ «The Beatles»-ը «բոլոր ժամանակների 50 լավագույն կատարողների» ցուցակում զբաղեցնում է առաջին տեղը։

«The Beatles»-ի անդամները դադարեցրին իրենց համատեղ աշխատանքը 1970 թվականին, չնայած դեռ 1967-ին Փոլը և Ջոնը շոուբիզնեսում կատարում էին սեփական նախագծերը։ Իսկ խմբի լուծարումից հետո խմբի անդամներից յուրաքանչյուրը շարունակեց իր սոլո կարիերան։

1980 թվականին սեփական տան մոտ սպանվեց Ջոն Լենոնը, 2001-ին քաղցկեղից մահացավ Ջորջ Հարրիսոնը։