Ձեր վստահելի աղբյուրը

«Զվարթնոց» օդանավակայանի կլոր մասնաշենքը ոչ միայն ճարտարապետական, այլ մշակութային, պատմական արժեք է: Լրագրողների հետ հանդիպման ժամանակ ասաց Հովհաննես Թումանյանի պետական տիկնիկային թատրոնի գեղարվեստական ղեկավար Ռուբեն Բաբայանը:

«Ինձ համար անհասկանալի է ամբողջ ճարտարապետական կոմպլեքսից միայն աշտարակը թողնելը: Պոմպակայա՞ն եք թողնում: Եթե միայն աշտարակը մնա, պոմպակայանի տպավորություն է թողնելու: Պետք է համալիրն ամբողջությամբ պահպանել: Եթե լինեն լայն քննարկումներ՝ առաջարկությունների, մոտեցումների, ներդրումների տեսակետից, հնարավոր կլինի: Այն որոշումները, որոնք կայացվում են փակ, նման արդյունքի են բերում»,- ասաց նա:

Ռ.Բաբայանի խոսքով,  հայտնի չեն ամբողջ գործարքի իրավական հիմքերը՝ ինչպիսի՞ պայմաններ են եղել, ինչպիսի՞ պարտավորություններ ունեն կողմերը, արդյո՞ք բոլոր կետերը պահպանվել են, արդյո՞ք պայմանագրում նշված է եղել, որ կոնցեսիոները պարտավոր է պահպանել շենքը. «Հարցեր ենք, որոնք իրավական պատասխան են պահանջում»:

Նա հիշեց 1988 թվականի աղետալի երկրաշարժը՝ նշելով, որ այդ ժամանակ օդանավակայանը դարձել էր Հայաստանի հանդեպ մարդասիրական կենտրոնի սիմվոլ:

«Բոլոր նրանք, ովքեր գնացել են և կամավոր աշխատել են, կհիշեն, թե ինչ էր կատարվում: Սա պատմություն է և վերացնել այս շերտը՝ վերացնում ենք ոչ միայն մշակույթը, այլ կարևոր մի շերտ, որը Հայաստանին կապում է ամբողջ աշխարհի հետ»,- ասաց Ռ. Բաբայանը:

Նա նշեց, որ կարելի է այդ շենքը, ելնելով տեսքից, դարձնել ուսումնական զվարճական կենտրոն երեխաների համար, կամ համաշխարհային օժանդակության թանգարան՝ երկրաշարժի օրերին Հայաստանի հանդեպ:

ՀՀ Ճարտարապետների միության նախագահ Մկրտիչ Մինասյանն ասաց, որ շենքը ամբողջությամբ կարող է ծառայել որպես օդանավակայան, իսկ եթե կոնցեսիոներն ուզում է նոր տերմինալ ավելացնել, կարող է դա անել, շենքը չի խանգարում:

«Կարևոր է, որ այդ շերտը չկորցնենք: Այլ տեղ լիներ, անպայման կպահպանվեր: Պարբերաբար նման երևույթներ կրկնվում  են մեզ մոտ»,- նշեց նա:

Մ. Մինասյանը հույս ունի, որ կարող են եզրեր գտնել այդ կառույցը պահպանելու համար, անհրաժեշտ է քննարկել:

Հիշեցնենք, որ Երևանի քաղաքապետարանից նախօրեին տեղեկացրեցին, որ սեյսմիկ պաշտպանության արևմտյան ծառայություն» ՊՈԱԿ-ի կողմից կազմված «Զվարթնոց» միջազգային օդանավակայանի թիվ 1 համալիրի կառույցների տեխնիկական վիճակի և սեյսմիկ խոցելիության գնահատման վերաբերյալ տրված հաշվետվությունը, ««Արմենիա» Միջազգային օդանավակայաններ» ՓԲԸ-ին 24.12.2015 թվականին տրվել է հին համալիրի օղակաձև վթարային էստակադայի ապամոնտաժման թիվ 01/18-Ե-1157-82 թույլտվությունը: Երևանի քաղաքապետարանի կողմից անհրաժեշտ  քաղաքաշինական փաստաթղթերը տրամադրվել են բացառապես ՀՀ կառավարության 2013 թվականի դեկտեմբերի 26-ի ««Զվարթնոց» միջազգային օդանավակայանի կոնցեսիոների կողմից ներկայացված 2013-2017 թվականների մաստեր պլանը հաստատելու մասին» թիվ 1495-Ն որոշմամբ և այլ իրավական ակտերովսահմանված պահանջներին և ընթացակարգերին համապատասխան»: Երևանի «Զվարթնոց» միջազգային օդանավակայանը հիմնադրվել է 1961թ., նոր շենքը (կլոր) նախագծվել է 1974թ., շահագործման է հանձնվել 1982 թվականին, ճարտարապետներն են` Ա. Թարխանյանը, Ս. Խաչիկյանը, Ժ. Շեխլյանը, Լ. Չերքեզյանը: Օդանավակայանի նոր մասնաշենքը շահագործման է հանձնվել 2011-ի աշնանը: