Ձեր վստահելի աղբյուրը

ՀՀ ժողովրդական արտիստ, «Ոսկե ծիրան» միջազգային կինոփառատոնի հիմնադիր տնօրեն, կինոռեժիսոր Հարություն Խաչատրյանի ֆիլմերն առաջիկայում ցուցադրվելու են Հնդկաստանում և Իսլանդիայում:  Կինոփառատոնի մամուլի ծառայությունից տեղեկացնում են, որ ռեժիսորի ֆիլմերի հետահայաց ցուցադրությունները, որոնք դեռևս նախորդ տարի են մեկնարկել, շարունակվում են 2016 թ-ին և առաջին ծրագիրը կմեկնարկի Բանգալորի (Հնդկաստան) միջազգային կինոփառատոնում՝ հունվարի 28-ին, ապա կշարունակվի Ռեյկավիկի (Իսլանդիա) «Stockfish» միջազգային կինոփառատոնում, որն այս տարի տեղի կունենա փետրվարի 18-28-ը:

Հիշեցնենք, որ Հարություն Խաչատրյանը 2015 թ-ին տոնել է իր 60-ամյա հոբելյանը: Հոբելյանի առիթով հեղինակավոր բազմաթիվ կինոփառատոներում կազմակերպվել են ռեժիսորի ֆիլմերի հետահայաց ցուցադրությունները: Մեկնարկը  տրվել է Բեռլինի Մաքսիմ Գորկու անվան թատրոնում, որտեղ մարտ ամսվա ընթացքում ցուցադրվել են Հարություն Խաչատրյանի ֆիլմերի ընտրանին: Ապրիլին վավերագրական կինոյի հեղինակավոր կինոփառատոներից մեկում՝ Նիոնի «Visions Du Reel»-ում տեղի է ունեցել Հարություն Խաչատրյանի ֆիլմերի հետահայաց ցուցադրությունն ու վարպետության դասընթացը:

Հետահայաց ցուցադրություններ տեղի են ունեցել նաև Ռուսաստանի՝ «Հայելի», Փարիզում անցկացվող «Evropa Akt Film», Վառնայի, Բաթումիի միջազգային կինոփառատոներում: Ստեղծագործական հատուկ երեկոներ են կազմակերպվել Մոսկվայի, Սոֆիայի, Թբիլիսիի միջազգային կինոփառատոների շրջանակներում:

Հոբելյանական տարում Հարություն Խաչատրյանն արժանացել է է մի շարք պատվո մրցանակների, այդ թվում՝  «Սուրբ Գևորգ»-ը (Մոսկվայի միջազգային կինոփառատոն), «Պրոմեթևս»-ը (Թբիլիսիի միջազգային կինոփառատոն)  և «Ոսկե փիղ»-ը (Ռուսաստանի կինոքննադատների և կինոլրագրողների ասոցիացիա):