Ձեր վստահելի աղբյուրը

Պետք է դադարեցնել քանդելով քաղաք, երկիր կառուցել: Կառուցելով են կառուցում,  ոչ թե քանդելով»,- լրագրողների հետ հանդիպման ժամանակ ասաց քանդակագործ Ֆերդինանտ Առաքելյանը՝ խոսելով «Զվարթնոց» օդանավակայանի կլոր մասնաշենքի մասին, որի էստակադայի ապամոնտաժման  թույլտվություն է տվել Երևանի քաղաքապետարանը:

Ըստ նրա, այսօր արժեքը փողն է, որը լուծում է հարցեր՝  քանդում են,  սարքում են:
Քանդակագործի խոսքով, կոնցեսիոնին ուղղակի դուր չի գալիս այս շենքը, գտնում է, որ հարմար շենք չէ:

«Պետք է գտնել տարբերակ ու ձեռք չտալ այս շենքին: Կան նման տարբերակներ: Ժողովուրդը սիրում է այդ կառույցը: Այն ուղղակի սնվել է Զվարթնոցի տաճարից՝  դարձնելով ժամանակակից, մոդեռն»,- ասաց Ֆ.Առաքելյանը:

Ասուլիսին ներկա գրականագետ Դավիթ Գասպարյանի խոսքով, պետք է հրապարակային բոլորը կոչ անեն՝ «վերջ տվեք քանդելուն, բավական է քանդել, ավերել»:

«Մեր վերջին ճարտարապետական լավագույն կոթողներից մեկն է, մնայուն արժեք է: Հայաստանի դիմագիծը լրացնող կառույցներից է: Ուզում եք կառուցել,  հնի կողքը նորը կառուցեք»,- ասաց նա:

Գրականագետի խոսքով, Հայաստանն անընդհատ քանդում են, կարծես փորձատեղի է դարձել:

Հիշեցնենք, որ Երևանի քաղաքապետարանը ««Արմենիա» Միջազգային օդանավակայաններ» ՓԲԸ-ին 24.12.2015 թվականին տվել է հին համալիրի օղակաձև վթարային էստակադայի ապամոնտաժման թիվ 01/18-Ե-1157-82 թույլտվությունը:

Երևանի «Զվարթնոց» միջազգային օդանավակայանը հիմնադրվել է 1961թ., նոր շենքը (կլոր) նախագծվել է 1974թ., շահագործման է հանձնվել 1982 թվականին, ճարտարապետներն են` Ա. Թարխանյանը, Ս. Խաչիկյանը, Ժ. Շեխլյանը, Լ. Չերքեզյանը: Օդանավակայանի նոր մասնաշենքը շահագործման է հանձնվել 2011-ի աշնանը: