Ձեր վստահելի աղբյուրը

«Չի կարելի թույլ տալ, որպեսզի քանդեն «Զվարթնոց» օդանավակայանի կլոր շենքի էստակադան, մինչև վերջնական որոշում չկայացվի, թե որ տարբերակով է ուժեղացվելու օդանավակայանը:  Չի կարելի մի բան քանդել, եթե որոշված չէ, թե ինչպես պետք է նախագծել այն, ինչ ուզում են»,- լրագրողների հետ հանդիպման ժամանակ ասաց «Հայնախագիծ» ինստիտուտի տնօրեն, Հանրային խորհրդի քաղաքաշինության ենթահանձնաժողովի նախագահ Գրիգոր Ազիզյանը:

Նա հիշեցրեց Երիտասարդական պալատի, Փակ շուկայի օրինակը. «Ո՞վ էր տվել Երիտասարդական պալատի սեյսմիկ վտանգավորության եզրակացությունը, ո՞վ էր այդ անձը, կազմակերպությունը, որի եզրակացության հիման վրա քաղաքապետարանը որոշեց քանդել Երիտասարդական պալատը: Թույլ տվեցին Փակ շուկայի տարածքում փոս փորել՝ ստորգետնյա ավտոկայանատեղիի համար: Այդ փոսը վերածվեց նրան, որ արվեց սեյսմիկ վտանգավորության եզրակացություն, որի հիման վրա շենքը պետք էր քանդվեր: Դա մենք փորձեցինք կանխել, սակայն հանկարծակի շենքն ինքն իրեն փլվեց: Եվ Երիտասարդական պալատը, և Փակ շուկան քանդելը պատվեր էր: Կոպիտ ասած, պատվեր է նաև «Զվարթնոցի» սեյսմիկ վտանգավորության եզրակացությունը, որը տրվել է մի մասնագետի կողմից, ում հրավիրել է հենց կոնսեցիոները»:

Ճարտարապետի խոսքով, նախնական հաշվարկները ցույց են տալիս, որ չնչին փոփոխությունները, որոնք չեն անդրադառնա արտաքին տեսքի վրա, արտաքին օղակը բերվում է այսօրվա գործող սեյսմիկ նորմերին:  Նա նաև հիշեց, որ դեռևս 2015 թ. մարտին, երբ մասնագետները ուսումնասիրեցին էստակադան, եզրակացություն տվեցին, որ 80 տոկոսը շատ լավ վիճակում է, 20 տոկոսն ունի վնասված մասեր, որոնք կարելի է վերականգնել և շահագործել:

«Այդ ժամանակ այդ եզրակացությունն ուղարկվեց կոնցեսիոներին: Ի՞նչ պատահեց այս մեկ տարվա ընթացքում, որ էստակադայի սեյսմիկ վիճակը դարձավ անթույլատրելի ու որոշվեց քանդել, հարցականները թողնում եմ նրանց, ովքեր որոշել են»,- ասաց նա:

Գ.Ազիզյանը նշեց, որ կոնսեցիոների կողմից ներկայացված նախագծի համաձայն, շենքի կլոր աշտարակն ու ներքին օղակը մնում են, արտաքին օղակը որոշել են քանդել, քանի որ, ըստ նրանց, այդպես է հնարավոր ընդլայնել օդանավակայանը:

«Շենքի հեղիկաներից Ժորժ Շեխլյանը տարբերակ է ներկայացրել՝ պահպանելով կառույցը  ներքին ու արտաքին տեսքով, երկու օղակներով, ընդլայնել օդանավակայանը 12 կայանատեղիով, մինչդեռ կոնսեցիոների ներկայացրած տարբերակով 10 տեղով է ավելանալու ինքնաթիռների կայանատեղին»,- ասաց նա՝ ընդգծելով, որ այսօրվա վիճակով օդանավակայանը կարող է ծառայել օդանավակայան՝ առանց որևէ բան քանդելու:  Բացի այդ նա նշեց, որ շենքը քանդել ու նորը սարքել տաս անգամ ավելի թանկ է, քան եղած շենքն ամրացնել, ուժեղացնել:

Ասուլիսին ներկա ճարտարապետ Անահիտ Թարխանյանի խոսքով, էստակադան հին օդանավակայանի սիրտն է, ներսի ու դրսի կառույցներն իրար է կապում, կարևոր դեր է խաղում: «Քանդելով այն՝ մեծ հարված է հասցվում օդանավակայանին, այն այլևս չի կարող գործել որպես օդանավակայան»,- ասաց նա:

Հիշեցնենք, որ Երևանի քաղաքապետարանը ««Արմենիա» Միջազգային օդանավակայաններ» ՓԲԸ-ին 24.12.2015 թվականին տվել է հին համալիրի օղակաձև վթարային էստակադայի ապամոնտաժման թիվ 01/18-Ե-1157-82 թույլտվությունը:

Երևանի «Զվարթնոց» միջազգային օդանավակայանը հիմնադրվել է 1961թ., նոր շենքը (կլոր) նախագծվել է 1974թ., շահագործման է հանձնվել 1982 թվականին, ճարտարապետներն են` Ա. Թարխանյանը, Ս. Խաչիկյանը, Ժ. Շեխլյանը, Լ. Չերքեզյանը: Օդանավակայանի նոր մասնաշենքը շահագործման է հանձնվել 2011-ի աշնանը: