Ձեր վստահելի աղբյուրը

«Եթե Ռուսաստանի Դաշնությունից Հայաստանին մատակարարվող գազի գինը նվազեցնելու նախադրյալներ չլինեին, ՀՀ կառավարությունը դժվար թե դիմեր ռուսական կողմին»,- այս մասին կառավարության նիստից հետո լրագրողների հետ զրույցում նշեց ՀՀ էկոնոմիկայի նախարար Կարեն Ճշմարիտյանը՝ պատասխանելով հարցին՝ կա՞ն նախադրյալներ, որ ռուսական կողմը չի մերժի գազի գինը նվազեցնելու հայկական կողմի խնդրանքը:

«Կառավարությունը դիմել է, և երբ պատասխանը լինի, բոլորս կիմանանք: Աներկբա է, որ էներգակիրների գները  տնտեսության համար կարևոր նշանակություն ունեն: Դա վերաբերում է ոչ միայն գազին: Կարծում եմ, որ մեր տնտեսվարողների, հատկապես նրանց համար, ովքեր գազի, ինչպես նաև էլեկտրաէնեգիայի մեծ սպառողներ են, այդ հնարավորությունը չօգտագործելը սխալ է»,-ասաց Կարեն  Ճշմարիտյանը:

Հարցին, թե եթե մերժեն, ապա հնարավո՞ր է, որ Հայաստանը հրաժարվի ռուսական գազից և Իրանից ավելի էժան գազ  ներկրելու ծրագիր սկսի, էկոնոմիկայի նախարարը  պատասխանեց. «Դրանք բանակցությունների թեմաներ են, երկուսն էլ մեր գործընկերներ երկրներն են, մանավանդ հիմա հանվում են Իրանի նկատմամբ կիրառվող որոշակի պատժամիջոցները, և Հայաստանի համար նոր հնարավորություններ են ստեղծվում: Դա լրացուցիչ թթվածին կարող է լինել մեր տնտեսության համար»:

Կարեն Ճշմարիտյանի խոսքերով՝ դա կանխատեսելով, նախորդ տարեվերջին կազմակերպել են գործարար հանդիպումներ: Ըստ նրա՝ իրանցի գործարարները հետաքրքրված են Հայաստանով: «Իրանցիները առաջին հերթին Հայաստանը դիտարկում են որպես հարթակ՝ դուրս գալու ԵԱՏՄ շուկաներ, ինչպես նաև օգտագործելու Հայաստանի հնարավորությունները, մասնավորապես, ԵՄ-ի և ԱՄՆ-ի հետ ունեցած արտոնյալ առևտրային ռեժիմները: Միաժամանակ հայկական ընկերությունները բանակցություններ են վարել 250 իրանական ընկերությունների հետ, մի քանիսն Իրանում նույնիսկ ներկայացուցչություններ են  բացել»,- ասաց Կարեն Ճշմարիտյանը: