Ձեր վստահելի աղբյուրը

Այսօր Ստրասբուրգում տեղի է ունեցել Հայաստան-ԵՄ Խորհրդարանական համագործակցության հանձնաժողովի (ԽՀՀ) տասնվեցերորդ նիստը, որին մասնակցում են ՀՀ և Եվրոպական խորհրդարանի անդամները: Նիստը հաջորդել է 3 օր առաջ տեղի ունեցած Հայաստան-ԵՄ համագործակցության խորհրդի գործադիր ճյուղից նրանց գործընկերների 16-րդ հանդիպմանը:

«Հայաստանի եվրոպացի բարեկամներ» կազմակերպությունը տեղեկացնում է՝ թե՛ ԽՀՀ-ն, և թե՛ Համագործակցության խորհուրդը հանդես են եկել համատեղ հայտարարություններով մի քանի կարևոր թեմաների շուրջ, մասնավորապես Հայաստան-ԵՄ հարաբերությունների ապագայի, հայաստանյան զարգացումների և Լեռնային Ղարաբաղի հակամարտության մասին: «Հայաստանի եվրոպացի բարեկամներ» կազմակերպությունը ողջունում է հայ և եվրոպացի պաշտոնյաների մասնակցությամբ այս շաբաթ տեղի ունեցած հանդիպումների արդյունքները:

«Մասնավորապես ողջունելի է, որ հանդիպումները կայացել են թե՛ կառավարության, և թե՛ օրենսդիր դաշտի ներկայացուցիչների մասնակցությամբ, ինչը վկայում է իրենց հարաբերություններին՝ Հայաստանի և Եվրամիության հաղորդած կարևորության մասին: Ընդունված հայտարարությունների խորությունն ու բովանդակությունը կարող են նաև հույս հանդիսանալ Հայաստան-ԵՄ հարաբերությունների հզորացման և մասնավորապես իրավական շրջանակային նոր համաձայնագրի արագ ստորագրման ոլորտների համար»,- նշել է ՀԵԲ ղեկավար Էդուարդո Լորենցո Օչոան:

Այս առումով, ԽՀ հանձնաժողովը նույնպես  ողջունել է 2015 թվականի դեկտեմբերի 7-ին Հայաստան-ԵՄ հարաբերությունների մեկնարկը բարձր մակարդակով, ի դեմս համապարփակ շրջանակային նոր համաձայնագրի, որը կներառի քաղաքական, տնտեսական և ոլորտային համագործակցություն: Հաշվի առնելով, որ Հայաստանը և Եվրամիությունը իրենց հարաբերությունները չեն սկսում զրոյից, այլ կարող են կիրառել Ասոցացաման համաձայնագրի շուրջ բանակցային գործընթացից ստացված աշխատանքի արդյունքը, ԽՀ հանձնաժողովը հույս է հայտնել Հայաստան-ԵՄ բանակցություններն արագ ավարտին հասցնելու մասին»:

Անդրադարձ է կատարվել նաև շարժունակության օրակարգին, և երկու կողմերը դրական գնահատեցին վիզաների դյուրացման և հետընդունման համաձայնագրերի որոտներում ներդրումը, ինչը կարող է ճանապարհ հարթել դեպի վիզաների ազատականացմանն ուղղված երկխոսությանը: Երկու կողմերն էլ ընդգծել են Հայաստանում բարեփոխումների իրականացման գործում Եվրամիության աջակցության կարևորությունը: Բացի այդ, ԵՄ-ն ընդունում է սիրիացի փախստականների ճգնաժամի հարցում Հայաստանի դրական դերը: ԽՀ հանձնաժողովը կոչ արեց Եվրոպական հանձնաժողովին և ԵՄ անդամ երկրներին դրական որակել համապատասխան ծրագրերի իրագործման հարցում Հայաստանի իշխանությունների կողմից հնչեցված աջակցության ցանկացած խնդրանք, որոնք նպատակաուղղված են Հայաստանում սիրիացի փախստականների սոցիալական ինտեգրմանը:

Հիշատակվել է նաև Լեռնային Ղարաբաղում առկա մտահոգիչ իրավիճակը: Հայաստան-ԵՄ ԽՀ հանձնաժողովն իր մտահոգությունն է հայտնել Լեռնային Ղարաբաղի հակամարտության հետևանքով շարունական մահվան դեպքերի և հրադադարի համաձայնագրի հաճախակի դարձող լուրջ խախտումների վերաբերյալ՝ ներառյալ ծանր հրետանու և ականանետերի գործածումը, որոնք շարունակաբար հանգեցնում են կյանքերի կորստի՝ նույնիսկ քաղաքացիական բնակչության շրջանում:

Երկու հայտարարություններում էլ վերահաստատվել է ԵԱՀԿ Մինսկի խմբի՝ որպես միջազգային մանդատ ունեցող միակ միջնորդի համանախագահության ներքո հակամարտության խաղաղ կարգավորման հարցում ԵՄ աջակցությունը: Ավելին, ԽՀ հանձնաժողովը կոչ է արել համաեվրոպական և միջազգային այլ կառույցներին ու մարմիններին համաձայնեցնել իրենց միջնորդություններն ու բանաձևերը ԵԱՀԿ Մինսկի Խմբի համանախագահների հայտարարություններին՝ Լեռնային Ղարաբաղի հակամարտության խաղաղ կարգավորման նպատակով:  

Որպես Լեռնային Ղարաբաղի և Եվրոպայի միջև շփումների ամրապնդման միջոց, Հայաստան- Եվրոպա խորհրդարանական հանձնաժողովը կոչ է անում ԵՄ-ին իր փոխանակման և շարժունակության ծրագրերում ընդգրկել ուսուցիչներ և ուսանողներ հակամարտության գոտիներից, ինչպիսին է Լեռնային Ղարաբաղը՝ համաձայն 2015 թվականի մայիսին ընդունված Բոլոնյան գործընթացի կոմյունիկեի, որը  վավերացվել է նաև ԵՄ անդամ բոլոր պետությունների և Եվրոպական հանձնաժողովի կողմից: