Ձեր վստահելի աղբյուրը

Հայաստանում գտնվող Ֆրանսիայի Արտաքին գործերի և միջազգային զարգացման նախարարին առընթեր Զարգացման և Ֆրանկոֆոնիայի հարցերով Պետքարտուղար, տիկին Աննիկ Ժիրարդենն այսօր Ծիծեռնակաբերդի բարձունքում էր:

Նա ծաղիկներ դրեց  Օսմանյան Թուրքիայի կողմից իրականացրած Հայոց Ցեղասպանության անմեղ զոհերի հիշատակը հավերժացնող անմար կրակի շուրջ:

Ցեղասպանության թանգարանում շրջելուց հետո նա լրագրողների հետ զրույցում նշեց, որ այստեղ է՝ հայ-ֆրանսիական բարեկամության ուղերձով:
 
«Ցնցված եմ, հուզված: Մենք միշտ եղել ենք, կլինենք Հայաստանի կողքին: Այսօր էլ ականատեսն ենք, որ Երկիր մոլորակի տարբեր վայրերում տեղի են ունենում նման զազրելի ոճրագործություններ: Մեր պարտքն է կանգնել նրանց կողքին»,-ասաց Ֆրանկոֆոնիայի հարցերով Պետքարտուղարը:

Ինչ վերաբերում է հարցին, թե ինչ փուլում է գտնվում Հայոց ցեղասպանության ժխտումը քրեականացվող օրինագիծը,  Պետքարտուղարը հիշեցրեց, որ Ֆրանսիան ճանաչել է Հայոց ցեղասպանությունը, երկու անգամ նախագահի մակարդակով այց է կատարել, մասնակցել է նաև Ցեղասպանության 100–րդ տարելիցի` Երևանում անցկացված միջոցառումներին ու զոհերի ոգեկոչման արարողություններին: Եվ, ըստ նրա, օրինագծի առնչությամբ այսօր Ֆրանսիայում ընթանում են քննարկումներ՝ թե’ Սենատում, թե՛ Ազգային ժողովում (ստորին պալատում):

Աննիկ Ժիրարդիենը նաև նշեց, որ Հայոց ցեղասպանության հարցը արծարծվել է նաև Ֆրանկոֆոնիայի միջազգային կառույցում, որի նախագահը դատապարտել է Հայոց ցեղասպանությունը:

«Մեր կառույցը, բնականաբար, ընդունում է իրողությունը, բայց պետք է ընդունել, որ պատմության մի էջ է, որը պետք է շրջել: Մենք այստեղ ենք, որպեսզի մեր գործուն մասնակցությամբ օգնենք Հայաստանին տարբեր ոլորտներում՝  տնտեսություն, զբոսաշրջություն, կրթական ոլորտներ, որպեսզի Հայաստանի երիտասարդությունը կարողանա հավուր պատշաճի իր գիտելիքներն ի սպաս դնել իր երկրի զարգացմանը»,- հավելեց Աննիկ Ժիրարդիենը:

Մանրամասները՝ տեսանյութում: