Ձեր վստահելի աղբյուրը

Տուժող կողմը չի հավատում, որ Շուշանիկ Բախշյանի մոտ առողջական այնպիսի վատ վիճակ է, որ քննչական գործողություններ չեն կարող իրականացնել: Այդ մասին Panorama.am-ի թղթակցի հետ զրույցում ասաց «Շենգավիթ» բժշկական կենտրոնի մանկաբարձ-գինեկոլոգ Շուշանիկ Բախշյանի գործով տուժող կողմի իրավահաջորդների ներկայացուցիչ-փաստաբան Մարինե Թովմասյանը:

Փաստաբանը պնդում է, որ պաշտպանական կողմը «արհեստականորեն խոչընդոտում է քննությանը» և այնպիսի իրավիճակ ստեղծում, թե իբր հիվանդ է ու քննչական գործողություններ չեն կարող կատարվել:

«Մենք փաստեր ենք ներկայացրել վարույթն իրականացնող մարմնին և փորձում ենք հասկանալ, թե այդ ամբողջ բեմականացված իրարանցումը, իրադարձությունը ում հեղինակածն էր, որ նման վիճակ ստեղծվի ու նա տեղափոխվի հիվանդանոց: Ես գնահատում եմ այս ամենը արհեստական, որպեսզի խոչընդոտվի քննությունը, որպեսզի քննչական գործողություններ չկատարվեն», -հավելեց փաստաբանը:

Թովմասյանը չի բացառում, որ բժիշկները իրենց գործընկերոջը աջակցելու համար են ծանր ախտորոշում տալիս:

Վարույթն իրականացնող մարմնի, այս դեպքում քննչական ծառայության գործողությունները, Մարինե Թովմասյանը իրավաչափ է գնահատում:

«Տուժող կողմի իրավունքների մասով որևէ խախտում չենք նկատել», -հայտնեց փաստաբանը:

Ինչ վերաբերում է Շուշանիկ Բախշյանին ազատ արձակելու մասին դատարանի որոշմանը, փաստաբան Թովմասյանն ասաց, որ չի կարող որևէ գնահատական տալ, քանի որ ինքը ծանոթ չէ դրան, և ավելին, դատավարության կողմ չի հանդիսանում:

«Մենք նոր միջնորդություններ ենք արել վարույթն իրականացնող մարմնին և այս պահին այդ միջնորդության հետ կապված ապացույցների որոշակի բազա ենք ներկայացնում», -այս գործով իրենց գործողությունների մասին ասաց փաստաբանը` հրաժարվելով հստակեցնել, թե մասնավորապես ինչի վերաբերյալ են միջնորդությունները:

Հիշեցնենք` հուլիսի 29-ին մահացել էր հուլիսի 27-ին կեսարյան հատումից հետո «HELLP» սինդրոմ համախտանիշի թոքաբորբ ախտորոշմամբ «Էրեբունի» բժշկական կենտրոն տեղափոխված Մերի Մարգարյանը, իսկ հաջորդ օրը մահացել էր նաև նրա նորածին դուստրը:

Դեպքի առթիվ հարուցվել էր քրեական գործ՝ ՀՀ քրեական օրենսգրքի 130-րդ հոդվածի 2-րդ մասի հատկանիշներով` «Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ»։

Մերի Մարգարյանը և նորածինը քրեական գործով ճանաչվել էին որպես տուժող, իսկ Մերի Մարգարյանի հայրը` Վաղինակ Մարգարյանը, տուժողների իրավահաջորդ:

Քննչական կոմիտեից հայտնել էին, որ դեպքի առթիվ նյութերի նախապատրաստման ընթացքում պարզվել էր, որ Մերի Մարգարյանը 4 օր շարունակ ունեցել է բարձր ջերմություն, սակայն բժշկական օգնություն և սպասարկում իրականացնող «Շենգավիթ» ԲԿ բժշկուհի Շուշանիկ Բախշյանը, պարտավոր լինելով կնոջը հոսպիտալացնել, հրաժարվել և չէր կատարել իր պարտականությունները։ Ցուցաբերված անբարեխիղճ վերաբերմունքի հետևանքով Մ. Մարգարյանը 2015թ-ի հուլիսի 29-ին մահացել էր, իսկ հաջորդ օրը մահացել էր նաև վերջինիս նորածին դուստրը: