Ձեր վստահելի աղբյուրը

«Արվեստը չի կարող փրկել աշխարհը, արվեստագետների ազդեցությունը մինիմալ է»,- Երևանում լրագրողների հետ հանդիպման ժամանակ ասաց լեհ հայտնի դիրիժոր, կոմպոզիտոր  Քշիշտոֆ Պենդերեցկին՝ պատասխանելով հարցին, թե  արդյո՞ք արվեստը կարող է փրկել աշխարհը՝ հաշվի առնելով նաև այն, որ այսօր աշխարհում շատացել են ահաբեկչությունները:

Ինչ վերաբերում է  Հայոց ցեղասպանության խնդրին, արվեստագետն ասաց, որ այս հարցի հետ կապված արել է այն, ինչ կարող է՝ գրել է ստեղծագործություն՝ հիշատակելով Հայոց ցեղասպանությունը:

«Ես ապրում եմ աշխարհի մեկ այլ մասում, մեզ համար դա պատմություն է: Արվեստը չի կարող նման հարցերում որևէ բան փոխել»,- ասաց Ք.Պենդերեցկին:

Հիշեցնենք, որ 2015-ին «Քեզ հետ, Հայաստա՛ն» համերգաշարի շրջանակում Նյու Յորքի  «Քարնեգի հոլ»-ում կայացած համերգին առաջին անգամ հնչել է Ք. Պենդերեցկու՝ Հայոց ցեղասպանությանը նվիրված  ստեղծագործությունը: 

Նշենք, որ Քշիշտոֆ Պենդերեցկին Երևանում է՝ մասնակցելու այսօր Հայաստանի պետական երիտասարդական նվագախմբի 10-ամյակին նվիրված համերգին::