Ձեր վստահելի աղբյուրը

Այսօր Եվրոպայի Խորհրդի Խորհրդարանական Վեհաժողովում (ԵԽԽՎ) Լեռնային Ղարաբաղի վերաբերյալ Ռոբերտ Ուոլթերի (Մեծ Բրիտանիա) հեղինակած «Բռնությունների աճը Լեռնային Ղարաբաղում և Ադրբեջանի այլ գրավյալ տարածքներում» բանաձևի նախագծի և Միլիցա Մարկովիչի (Բոսնիա և Հերցեգովինա) «Ադրբեջանի սահմանային շրջանների բնակչությունը միտումնավոր զրկվում է ջրից» բանաձևի վերաբերյալ հայտարարություն է տարածել Եվրոպայի Հայ Դատի հանձնախումբը:

Հայտարարության մեջ ասվում է, որ 2015-ի նոյեմբերից ի վեր՝ Եվրախորհրդի 20 երկրներում հետևողական Եվրոպայի Հայ Դատի հանձնախումբը աշխատանք էր ծավալել՝ մեկնաբանելով զեկույցների էությունը և մատնանշելով դրանց միակողմանի բնույթը: Ինչպես նաև, Եվրոպայի Հայ Դատի հանձնախումբը գտնվում էր Ստրասբուրգում՝ մոտիկից հետևելով քվերակության ընթացքին:

Հայտարարության մեջ ասվում է, որ զեկույցների երկու նախագծերում էլ ակնհայտորեն բացակայում էին մանրակրկիտ, անկողմնակալ ուսումասիրությունը, դրանցում ընտրողաբար բաց էր թողնված վճռորոշ փաստեր և դրանք ընդհանուր առմամբ  վնասում են Լեռնային Ղարաբաղի բանակցային գործընթացը: ԵԱԿՀ Մինսկի խումբը տարածել էր մի քանի հայտարարություններ, որոնցից ամենավերջինը, միացյալ մամլո հայտարարություն էր, որով համանախագահները  կոչ էին անում ԵԽԽՎ-ին չբարդացնել բանակցային գործընթացը: Ռոբերտ Ուոլթերի կողմից հեղինակած և չընդունված զեկույցը արտացոլում էր պաշտոնական Ադրբեջանի և Թուրքիայի ակնհայտ դիրքորոշումը Լեռնային Ղարաբաղի հակամարտությունում:

Միլիցա Մարկովիչը, ով երբեք չէր այցելել ջրամբար,  որպես պատրվակ օգտագործեց այս մարդասիրական հիմնախնդիրը՝  Լեռնային Ղարաբաղի հիմնահարցի վերաբերյալ  խիստ կողմնակալ հայտարարություն անելու համար: Զեկույցի նախագծի և տեխնիկական զեկույցի (որը պետք է ընկած լիներ նախագծի հիմքում) միջև համեմատությունը ցույց է տալիս, որ տիկին Մարկովիչը միտումնավոր չափազանցրել է հավանական վտանգի հետևանքները: Ինչպես նաև նա զեկույցի նախագծում չի ընդգրկել տեխնիկական զեկույցում տեղ գտած կարևոր մի շարք փաստեր, քանի որ դրանք չէին համապատասխանում իր կողմնակալ  միտումներին:

Եվրոպայի Հայ Դատի հանձնախմբի նախագահ Գասպար Կարապետյանն այս առնչությամբ ասել է. «Այսօր Եվրոպայի Խորհրդի Խորհրդարանական Վեհաժողովը մերժեց Ռոբերտ Ուոլթերի չափազանց սադրիչ զեկույցը: Այսպիսով, այսօրվա քվերկությունն ընդհանուր առմամբ կարելի է դրական  համարել: Ադրբեջանի ներկայիս կառավարությանը և պրն. Ուոլթերին չհաջողվեց  Եվրախորհուրդն օգտագործել որպես հակահայկական պատերազմական հռետորաբանության գործիք»:

Կարապետյանը ավելացրել է, որ «Ցավոք սրտի, Եվրոպայի Խորհրդի Խորհրդարանական Վեհաժողովը ընդունեց մեկ այլ կողմնակալ զեկույց՝ Միլիցա Մարկովիչի ներկայացրած զեկույցը Սարսանգի ջրամբարի մասին: Ակնհայտ է, որ դեռ ամենասկզբից տիկին Մարկովիչը փորձում էր օգտագործել այս մարդասիրական հիմնախնդիրը՝ պատրաստելու համար մի զեկույց, որը կարտահայտեր Լեռնային Ղարաբաղում Ադրբեջանի դիրքորոշումը»:

«Այժմ հայկական դիվանագիտության խնդիրն է իրազեկել Հայաստանի սահմանամերձ շրջանների քաղաքացիների բնապահպանական, մարդու իրավունքների և Ադրբեջանի կողմից ստեղծված այլ նմանատիպ խնդիրների մասին»,- եզրափակել է Եվրոպայի Հայ Դատի նախագահը:

Հիշեցնենք, որ այսօր ԵԽԽՎ-ն քննարկեց Ռոբերտ Ուոլթերի հեղինակած «Բռնությունների աճը Լեռնային Ղարաբաղում և Ադրբեջանի այլ գրավյալ տարածքներում» անվանումով բանաձևի նախագիծը, որը քվեարկությամբ մերժվեց ԵԽԽՎ-ի կողմից։ Երկրորդը Միլիցա Մարկովիչի հեղինակած «Ադրբեջանի սահմանային բնակչությունը միտումնավոր զրկված է ջրից» զեկույցն էր, որ ընդունվեց ԵԽԽՎ-ի կողմից։