Ձեր վստահելի աղբյուրը

Ներկայումս  սուր շնչառական հիվանդություններով, այդ թվում՝ H1N1 վիրուսով, անվճար բուժօգնություն կարող են ստանալ միայն բնակչության սոցիալապես անապահով ու առանձին (հատուկ) խմբերի ցանկում ընդգրկված քաղաքացիները, ինչպես նաև անհետաձգելի բուժօգնություն պահանջող` ՀՀ առողջապահության նախարարի 2013 թվականի հոկտեմբերի 18-ի N65-Ն հրամանով հաստատված հիվանդությունների և վիճակների ցանկերում ընդգրկված ախտորոշումներով անձինք:

Հունվարի 21-ից սուր շնչառական հիվանդություններով, այդ թվում՝ H1N1 վիրուսով պայմանավորված հիվանդությունների բուժումը, վճարովի է: ՀՀ առողջապահության նախարարի հրամանով՝ գրիպով և թոքաբորբով հիվանդների բուժումը հանրապետության հիվանդանոցներում մինչև հունվարի 20-ն իրականացվել է պետպատվերի շրջանակում՝  «նկատի ունենալով, որ հունվարի 20-ից հետո արձանագրվել է սեզոնային գրիպի և սուր շնչառական վարակների դեպքերի նվազման միտում»։

Քանի որ հանրապետությունում, այնուամենայնիվ, դեռևս առկա են սուր շնչառական վիրուսներով պայմանավորված հիվանդացության դեպքեր, այսինքն վարակը վերջնականապես չի նահանջել,  փորձեցինք պարզել, թե ինչպես են վարվում նման դեպքերում  բուժհաստատությունները:

Արարատի մարզի առողջապահության և սոցիալական ապահովության վարչության պետ Ստեփան Խաչատրյանը Panorama.am-ի թղթակցի հետ զրույցում նշեց. «Մինչև հունվարի 22-ը մարզում գրանցվել է սուր շնչառական վարակներով հոսպիտալացման 161 դեպք, իսկ այսօրվա դրությամբ մարզի հիվանդանոցներում ստացիոնար բուժում է ստանում 102 քաղաքացի»:

Նրա խոսքերով՝ մինչև հունվարի 20-ը գրիպի հետևանքով անհրաժեշտ ստացիոնար բուժումը բոլոր սոցիալական և տարիքային խմբերի համար իրականացվում էր անվճար: Սակայն, ըստ նրա, մարզպետարանն ու բուժհաստատություններն ունեն պետպատվերի շրջանակում բուժօգնություն տրամադրելու սահման, և բուժհաստատություններն անհրաժեշտության դեպքում բուժումն իրականացնում են անվճար:

Ճշտող հարցին, թե բուժհաստատությունները բուժումն իրականացնում են պետպատվերի համապատասխան ծրագրերի պայմանագրական գումարների 5-ական տոկոսների շրջանակներում, թե մարզեպատարանն է տրամադրում, Ստեփան Խաչատրյանն ասաց, որ դեռևս անվճար բուժումն իրականացնում են բուժհաստատությունները: Ըստ նրա, եթե հաստատություններն անվճար բուժում չտրամադրեն, այսինքն՝ նրանց հատկացված չափաքանակը կվերջանա, ապա ցանկացած քաղաքացի կարող է դիմել մարզպետարան և բուժում ստանալ պետպատվերի շրջանակում:

«Պետք է նշեմ, որ նախորդ տարի մեզ դիմած բոլոր քաղաքացիներին աջակցել ենք, որպեսզի նրանց բուժումն իրականացվի պետպատվերի շրջանակում»,- նշեց Ս.Խաչատրյանը:

Արմավիրի մարզի Առողջապահության և սոցիալական ապահովության վարչության պետ Լարիսա Մուրադյանը վստահեցրեց, թե համապատասխան բուժօգնություն կտրամադրվի յուրաքանչյուրին: Ըստ նրա՝    մարզի բոլոր բուժհաստատություններին հանձնարարվել է, որ եթե լինեն սոցիալական խմբերում չընդգրկված սուր շնչառական վիրուսներով հիվանդ քաղաքացիներ, ովքեր պետպատվերի շրջանակում բուժում ստանալու կարիք ունեն, իրենց հատկացված 5-ական տոկոսների շրջանակներում բուժում տրամադրեն, իսկ եթե չեն կարող, ապա այդ քաղաքացիներին՝ անվճար բուժում տրամադրելու հարցում կօգնի մարզպետարանը՝ նրանց տրամադրելով անվճար ուղեգիր:

«Որևէ հիվանդ չի մերժվի: Ես վստահեցնում եմ, որ գրիպով և թոքաբորբով հիվանդները, ովքեր ստացոնար բուժման կարիք ունենան, բայց հնարավորություն չունեն վճարելու, ապա նրանց՝ պետական պատվերի շրջանակներում բուժում ստանալու դիմումները չեն մերժվի, քանի դեռ հանրապետությունում տարածված են սուր շնչառական վիրուսները»,- ընդգծեց Լարիսա Մուրադյանը:

Եվս մի հարց՝  որն է չափանիշը «հնարավորություն չունեն վճարելու»։
Պատասխանեցին, որ որոշելու ձև չկա. «Պարզապես եթե քաղաքացին վճարունակ չէ, ապա դիմում է տվյալ բժշկական կենտրոն և խնդրում է, որ զեղչեն կամ աջակցեն»։