Նիդերլանդներում ներկայացվել է Վարուժան Ոսկանյանի «Շշուկների մատյանը» վեպի հոլանդերեն հրատարակությունը

Մշակույթ 20:21 26/01/2016 Աշխարհում

Նիդերլանդներում ներկայացվել է Վարուժան Ոսկանյանի «Շշուկների մատյանը» վեպի հոլանդերեն հրատակությունը:

ԱԳՆ մամուլի և տեղեկատվության վարչությունից հայտնեցին, որ հունվարի 22-ին Նիդերլանդներում Ռումինիայի դեսպանությունում, Ռումինական մշակութային կենտրոնի նախաձեռնությամբ, տեղի է ունեցել ռումինահայ գրող Վարուժան Ոսկանյանի «Շշուկների մատյանը» վեպի հոլանդերեն թարգմանության շնորհանդես-քննարկումը:

Միջոցառմանը ներկա էին Նիդերլանդներում Ռումինիայի դեսպան Իրենի Կոմարոչին, ՀՀ դեսպան Ձյունիկ Աղաջանյանը, Նիդերլանդների հայ համայնքի ներկայացուցիչներ, ռումինացի և հոլանդացի մշակութային գործիչներ: Հիմնական բանախոսը հեղինակն էր, ով իր ելույթում անդրադարձել է գրքի կարևորությանը պատմական փաստերի վերաբերյալ տարբեր երկրների ընթերցողների իրազեկվածության բարձրացման առումով, ինչպես նաև խորը ցավ ապրած ու տառապանք կրած մարդկանց համար մոռացության, վրեժխնդրության ու ներման բարդագույն ընտրության հոգեբանական հետևանքներին:

Հունվարի 23-ին գիրքը ներկայացվել է Հաագայի «Աբովյան» մշակութային միության կենտրոնում: Միջոցառման շրջանակներում Վարուժան Ոսկանյանը հանդես է եկել դասախոսությամբ՝ ներկայացնելով Հայոց ցեղասպանության վերապրածների համար սփյուռքահայ գաղթօջախներում նոր կյանք սկսելու առանձնահատկությունները:

«Շշուկների Մատյան» վեպի հոլանդերեն թարգմանությունը հոլանդացի ընթերցողներին և հոլանդահայերին է ներկայացվել նաև Ամստերդամի Սուրբ Հոգի եկեղեցում:

Գրքի հոլանդերեն թարգմանությունն իրականացրել է Յան Վիլեմ Բոսը և հրատարակվել է «Պեգասուս» հրատրակչության կողմից:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: