«Ուղղակի ուզում եմ, որ էդ մի որդուս ինձ տան». Զոհված զինծառայող Ռուբեն Ալեքսանյանի մոր խնդրանքը

Հասարակություն 19:48 27/01/2016 Հայաստան

Ռուբեն Ալեքսանյանը, ով նախորդ տարվա դեկտեմբերի 18-ին հակառակորդի կողմից ձեռնարկված դիվերոսին գործողությունների ժամանակ ծավալված մերձամարտերի ընթացքում արիաբար զոհվել էր, ՀՀ նախագահ Սերժ Սարգսյանի հրամանագրով այսօր Հայրենիքի սահմանները պաշտպանելիս ցուցաբերած արիության և անձնվիրության համար հետմահու պարգևատվրեց Արիության մեդալով:
Որդու մեդալը ստացավ մայրը՝ Լուսիկ Ալեքսանյանը:

«Որդիս հերոսաբար է կռվել, անգամ մի փամփուշտ իր համար չէր պահել, 120 փամփուշտ վիրավոր վիճակում կրակելով՝ զոհվել էր»,- նախագահական նստավայրում որդու պարգևը ստանալուց հետո լրագրողների հետ զրույցում ասաց Լ. Ալեքսանյանը:

Նա չորս զինվոր է պարգևել հայրենիքին. «Ռուբենը երկվորյակ եղբայր ունի, ով հիմա ծառայության մեջ է: Տաշիրի հիվանդանոցում երբ ծնվեցին, բժիշկներն ասում էին՝ եթե մեր պետությունը աղքատ չլիներ, իսկ գիտենք, թե 1996 թվականը դժվար տարիներից մեկն էր, պետք է քեզ այստեղից զարդարված դուրս հանի, որովհետև չորս զինվոր ես տալիս: Նախագահն այսօր հարցրեց՝ էլի զինվոր տվել եք, ասացի՝ չորս»:

Ռուբենի երկվորյակ եղբայրն այժմ ծառայում է Ստեփանակերտում:

«Խնդրում եմ, որ այս տղայիս ազատեն ծառայությունից: Դեկտեմբերի վերջին դիմում եմ ներկայացրել, իրենք միաբջիջ երեխաներ են ու զույգի մյուսը շատ ծանր է տանում եղբոր մահը, անգամ զգացել է, որ նրան խփել են, տեղից վեր է թռչել։ Ուղղակի ուզում եմ, որ էդ մեկին ինձ տան»։

Լրագրողների հետ զրույցում ՀՀ պաշտպանության նախարար Սեյրան Օհանյանն ասաց. «Այդ խնդրանքն արդեն իսկ կատարված է: Հրամանը կա, մյուս որդին կտեղափոխվի ավելի մոտ տարածք ծառայությունը շարունակելու համար և ոչ առաջին գիծ»:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: