Ձեր վստահելի աղբյուրը

ԵԽԽՎ-ում նախօրեին քվեարկության դրված երկու հակահայ բանաձևերն էլ բավականին անբնական, աննորմալ պայմաններում են պատրաստվել, երկու զեկույցն էլ եղել է միակողմանի: Լրագրողների հետ հանդիպման ժամանակ ասաց «Եվրոպական ինտեգրացիա» ՀԿ նախագահ, ԱԺ պատգամավոր Կարեն Բեքարյանը՝ խոսելով նախօրեին ԵԽԽՎ լիագումար նիստում քվեարկության դրված երկու հակահայ բանաձևերի մասին:

Հիշեցնենք, որ նախօրեին ԵԽԽՎ լիագումար նիստում ընդունվել է բոսնիացի պատգամավոր Միլիցա Մարկովիչի հեղինակած «Ադրբեջանի սահմանամերձ շրջանների բնակիչները միտումնավոր զրկված են ջրից» բանաձևի նախագիծը՝ մի շարք փոփոխություններով: Բանաձևն ընդունվել է 98 «կողմ», 71 «դեմ» և 40 «ձեռնպահ» ձայների հարաբերակցությամբ: Իսկ բրիտանացի պատգամավոր Ռոբերթ Ուոլթերի հեղինակած «Բռնության աճը Լեռնային Ղարաբաղում և Ադրբեջանի այլ օկուպացված տարածքներում» բանաձևի նախագիծը տապալվել է. դահլիճում ներկա պատգամավորներից 66-ը քվեարկել էին «կողմ», 70-ը՝ «դեմ» և 45-ը «ձեռնպահ»:

Նախ, ըստ Կ.Բեքարյանի, անբնական է, որ զեկույցների պատրաստման ընթացքում դրանք պատրաստողները չեն այցելել այն երկիր, որին վերաբերում էին զեկույցները՝ ԼՂՀ, ինչպես նաև տվյալ երկրի բնակիչները որևէ մասնակցություն չեն ունեցել զեկույցների պատրաստմանը:

Կ.Բեքարյանի խոսքով, ԵԽԽՎ-ն ունեցել է փորձ, երբ անկախ տվյալ երկրի քաղաքական ճանաչումից, քննարկումների ժամանակ տվյալ խնդրին առնչվող խմբերի մասնակցությունն ապահովվել են, խոսքը վերաբերում է  Կոսովոյին, Հյուսիսային Կիպրոսին:

Նա նաև ասաց, որ Եվրոպայի խորհուրդն ընդհանրապես, ԵԽԽՎ-ն  մասնավորապես հակամարտությունների  կարգավորման հարցում միջնորդի դեր ստանձալու փորձ չունեն:

«Անբնական է, որ դուրս են գալիս իրենց առաքելություններից»,- ասաց Կ.Բեքարյանը՝ հավելելով, որ կա ղարաբաղյան կոնֆլիկտով զբաղվող կառույց՝ ԵԱՀԿ, հետևաբար փորձել հարակից էլեմենտներով, երևույթներով, նպաստ բերել գործընթացին, բայց իրականում վնասել, անբնական է:

Կ.Բեքարյանը նաև նշեց, որ Ռոբերթ Ուոլթերի զեկույցի դեպքում հաղթեց բանականությունը, այդ զեկույցի մերժումը  դրա վառ արտահայտությունն է:

«Ռոբերթ Ուոլթերի զեկույցն իր կշռով հավասարազոր չէր Մարկովիչի զեկույցին: Նույն դաշտում, կշեռքի նույն նժարին դնելը  սխալն է, կշիռները  որևէ կերպ նույնը չեն»,- ասաց նա:

Կ.Բեքարյանի խոսքով, ԵԽԽՎ բանաձևերը չունեն որևէ իրավական ուժ, քաղաքական ֆոնի էլեմենտ են, որոշակիորեն ցույց են տալիս տրամադրություններ, ոչ ավելին. «Սա չի նշանակում, որ զեկույցների նկատմամբ պետք է լինել անուշադիր, բայց միաժամանակ նշանակում է, որ զեկույցներն իրական քաղաքականության, որոշումների ընդունման գործընթացի վրա ունեն բավական չնչին ազդցություն, այն էլ ոչ ուղղակի, այլ ֆոնային»: