Ձեր վստահելի աղբյուրը

Մատաղիսում զինվորական ծառայությունն իրականացնող Արա Երեմյանը մարտական հերթապահությունն իրականացնելիս հրազենային վիրավորում էր ստացել հակառակորդի կրակից: Դեպքը տեղի էր ունեցել անցած տարվա օգոստոսին: ՀՀ նախագահ Սերժ Սարգսյանի կողմից այսօր  նա պաարգևատրվեց «Մարտական ծառայության» մեդալով:

«Թշնամին չի կարա մեզանից ուժեղ լինի: Ճիշտ ա՝ իրենք շատ են, բայց մեր նման դուխ չունեն: Չեն կարա մեր նման ուժեղ լինեն, որովհետև մենք հայ ենք, իրենք՝ թուրք: Դրանով ամեն ինչ ասված է»,-պարգևատրումից հետո լրագրողների հետ զրույցում ասաց Ա. Երեմյանը:

Վնասվածք ստանալու մասին չի ցանկանում մանրամասներ պատմել, միայն ասում է՝ շատ արյուն էր կորցրել:

«Ամբողջությամբ դեռ չեմ ապաքինվել, բուժումս ընթացքի մեջ է»,-ասաց սակավախոս Ա. Երեմյանը:

Կրտսեր սերժանտ Հակոբ Դանիելյանն էլ «Մարտական ծառայություն» մեդալ ստանալու համար այսօր նախագահի նստավայր էր եկել: Նա էլ ծառայության մասին չի ուզում խոսել, թաքցնում է նաև, թե ինչու համար է այսօր պարգևատրվում:

«Հարաբերությունները շատ նորմալ են, մեկը մեկի հետ շատ կապված ենք: Այսքանը»,-ասաց նա:

Պայմանագրային զինծառայող Հ.Դանիլյանը հպարտությամբ է խոսում բանակի  մասին, ընդգծում, որ մարտունակ բանակ ունենք. «Ինչքան էլ թշնամին զինվի, մենք ուժեղ ենք»: