Ձեր վստահելի աղբյուրը

Երեք ազատամարտիկների մոր սրտի վիրահատության համար ՀՀ առողջապահության նախարարությունը դիմումի հիման վրա կարող է տրամադրել 365 հազար դրամ պետական աջակցություն: Այս մասին Panorama.am-ին հայտնեց ԱՆ մամուլի խոսնակ Անահիտ Հայթայանը:

«Այլ բան օրենսդրությամբ սահմանված չէ, նախարարությունը հնարավորություն էլ չունի»,-ասաց Հայթայանը, ավելացնելով, որ հարցն ավելի շատ Պաշտպանության նախարարության տիրույթում է:

ՊՆ մամուլի խոսնակ Արծրուն Հովհաննիսյանը Panorama.am-ին ասաց, դեպքի մասին տեղյակ է, անձամբ է զբաղվում: Խնդրի լուծման ընթացքի ու արդյունքի  մասին խոստացավ տեղեկացնել:

Հիշեցնենք, որ Հովհաննես Գալստյանը երեկ ֆեյսբուքյան իր էջում մասնավորապես գրել էր.

«Արդեն մի շաբաթ է, ինչ ՖԲ-ով դիմել էի վարչապետին, պաշտպանության և առողջապահության նախարարներին, տեղեկացնելով, որ զոհված ազատամարտիկի մորը անհրաժեշտ է սրտի վիրահատություն՝ 4 ստենտի տեղադրմամբ:

Մեկ շաբաթվա ընթացքում ստացանք միայն ԼՌՈՒԹՅՈՒՆ ԵՎ ԱՐՀԱՄԱՐՀԱՆՔ:

Այսօր ամբողջ օրը լսում ենք բարձրագոչ ճառեր նվիրված մեր բանակին և ազգի համար իրենց կյանքը զոհած հերոսներին:

 Իսկ զոհվածի մորը կառավարության որոշմամբ զրկում եք ԱՊՐԵԼՈՒ ԻՐԱՎՈՒՆՔԻՑ: 

Մեդալներ եք շնորհում, որ ի՞նչ անեն»:

Ազատամարտիկն ավելի ուշ շնորհակալություն էր հայտնել գրառմանն արձագանքողներին, նշել, որ առայժմ փորձում է ստիպել, որ «հարգեն մեր իրավունքները: Եթե գոնե 50 տոկոս զիջեն, մնացածը վարկ կվերցնենք և անել կտանք»:

Լուսանկարը՝ Հայոց աղավնիներ
1994թ.:Մարտ:Գանձասար:
Ձախից՝  Հովհաննես Գալստյան