Ձեր վստահելի աղբյուրը

«Որևէ երկիր չի ցանկանում, որ Մարդու իրավունքների եվրոպական դատարանն իր դեմ որոշումներ, վճիռներ կայացնի: Կարող եմ ասել, որ այդ ցուցանիշներով Հայաստանը վատթարագույն վիճակում չի»,- լրագրողների հետ զրույցում ասաց արդարադատության նախարար Արփինե Հովհաննիսյանը:

Ըստ նրա, բնականաբար, թույլատրվում են սխալներ, որոնցից հետո իրականացվում են քայլեր:

«Իրականացվում է վերլուծություն, օրենսդրական բարեփոխումներ: ՄԻԵԴ ցանկացած որոշում սկզբունքորեն հիմք է  տալիս, որպեսզի վերլուծես, թե որտեղ են եղել բացթողումներ՝ օրենսդրական մակարդակո՞ւմ, թե՞ օրենքի բացեր են եղել: Յուրաքանչյուր կոնկրետ գործով մենք պետք է վերլուծությունից հետո ունենանք քայլերի հաջորդականություն»,- ասաց նախարար Ա.Հովհաննիսյանը:

Պատասխանելով հարցին, թե արդյո՞ք Ռամիլ Սաֆարովի գործով  Հայաստանը երրորդ կողմ կներգրավվի,  նախարարն ասաց, որ դեռևս չի ցանկանում մեկնաբանել ՄԻԵԴ-ի որոշումն այն մասին. «Ես ձեռնպահ կմնամ որևէ մեկնաբանություն տալուց, մինչև լինի վերջնական որոշում»:

Հիշեցնենք, Ադրբեջանի և Հունգարիայի կառավարությունները ճանաչվել են որպես Ռամիլ Սաֆարովի վաղաժամ ազատ արձակման գործով պատասխանող կողմեր և պետք է բացատրություններ ներկայացնեն Մարդու իրավունքների եվրոպական դատարանին: