Ձեր վստահելի աղբյուրը

Քաղաքացիների 61 տոկոսը տեղյակ չէ, որ կա «Անձնական տվյալների պաշտպանության մասին» ՀՀ օրենք, որի համաձայն իրենք իրավունք ունեն պետական և մասնավոր կազմակերպություններից իմանալ, պահանջել և ստանալ իրենց մասին պահվող տեղեկությունը: Այդ մասին Panorama.am-ը տեղեկանում է ԱՆ Անձնական տվյալների պաշտպանության հանրային հաշվետվությունից:

Հարցված քաղաքացիների 39 տոկոսն է միայն տեղյակ եղել, որ ունի նման իրավունք: Անձնական տվյալների պաշտպանության ոլորտում իրավիճակի նախնական գնահատման նպատակով հարցումն անցկացրել է Հետազոտական ռեսուրսների կովկասյան կենտրոնը Երևանում և մարզերի քաղաքային ու գյուղական համայնքների 18-65 տարեկան 279 քաղաքացիների շրջանում:

Հարցին, թե արդյոք քաղաքացիներին մտահոգու՞մ է, որ պետական և մասնավոր կազմակերպությունները կարող են պահել իրենց անձնական տվյալները, հարցվածների 46 տոկոսը պատասխանել է, որ իրենց չի մտահոգում:

Մտահոգություն հայտնած քաղաքացիների 20 տոկոսն ասել է, որ վստահ չէ, թե անձնական տվյալները անվտանգ ու բավարար են պաշտպանված, 13 տոկոսն ասել է, որ տվյալներն իր անձնական գաղտնիքն է, 9 տոկոսն ասել է, որ իրենց կարծիքով տվյալների օգտագործումը բավարար չի հսկվում:

Ավելին հարցվածների 62 տոկոսը պայմանագիր կամ համաձայնագիր ստորագրելուց չի ծանոթանում, թե այլ կողմին փոխանցած իրենց մասին տվյալները ինչպես կարող են օգտագործվել։

Այդ պայմաններին ասել է, որ ծանոթանում է միայն հարցված քաղաքացիների 38 տոկոսը:
Հարցվածների հիմնական մասին` 47 տոկոսին չի հետաքրքրում այն, որ հանրային վայրերում իրենց տեսաձայնագրում են: Հարցվածների գրեթե նույնքան հատվածին չի մտահոգում, որ կազմակերպությունները կարող են պահել իրենց անձնական տվյալները։

Նշենք, որ ԱՆ Անձնական տվյալների պաշտպանության գործակալությունը հիմնվել է բոլորովին վերջերս` 2015 թվականի հոկտեմբերի 9-ին: Առաջիկա հինգ տարիների համար գործակալության պետ է նշանակվել Շուշան Դոյդոյանը: Իր գործունեության կարևորագույն սկզբունքներից Դոյդոյանը համարում է կառույցի հրապարակային գործունեությունը:

«Չէի ցանկանա, որ գործակալությունը դառնար հերթական հսկիչ և տուգանող կառույց. Նման կառույցները մեր երկրում շատ են։ Պետք չէ համալրել դրանց շարքը: Մեր խնդիրն է քաջալերել և խրախուսել անձնական տվյալներ մշակող ընկերություններին, որ խնամքով մշակեն և անվտանգ պահպանեն դրանք: Վարչական պատասխանատվությունը զուտ լրացուցիչ գործիք է, ոչ թե մահակ, որի «ահից» տվյալներ մշակողները ստիպված լինեն կատարել օրենքը», -հաշվետվության մեջ նշել է կառույցի ղեկավարը:

Ի դեպ, վարչական պատասխանատվության մասին. գործունեության այս կարճ ժամանակահատվածում գործակալությունում հարուցվել են անձնական տվյալների մշակման իրավաչափության վերաբերյալ առաջին վարչական վարույթները:

Հարուցված երկու վարույթից մեկը քաղաքացու դիմումի հիման վրա է և վերաբերում է Երևանի քաղաքապետարանի կողմից քաղաքացու ավտոմեքենայի տեսագրության օգտագործմանը՝ որպես քաղաքացու կողմից իրավախախտման փաստի ապացույց: Քաղաքացին խնդրել է ստուգել իր անձնական տվյալների օգտագործման իրավաչափությունը:

Մյուս վարույթը հարուցվել է փակ բաժնետիրական ընկերության դիմումի հիման վրա ևվերաբերում է ՀՀ ԱՆ Իրավաբանական անձանց պետական ռեգիստրի գործակալության կողմից ՓԲԸ-ի բաժնետերերի մասին տեղեկությունները իրավաբանական անձանց պետական գրանցամատյանում ներառելու իրավաչափությանը: ՓԲԸ-ն խնդրել է Պետական ռեգիստրի գործակալությունից պահանջել իրավաբանական անձանց պետական գրանցման գրանցամատյանից ոչնչացնել ՓԲԸ-ի բաժնետերերի կազմի, նրանց մասնակից դառնալու, մասնակցության չափերի և դրանց փոփոխության վերաբերյալ տեղեկատվությունը:

Այս երկու վարույթներն առայժմ ընթացքի մեջ են: