Ձեր վստահելի աղբյուրը

Հունվարի 1-ից  մինչև այսօր ստացիոնար բուժհիմնարկներում սուր շնչառական հիվանդության, գրիպի ու դրանց հետևանքով առաջացած բարդություններով բուժօգնություն է ստացել շուրջ  3000 քաղաքացի: Այս մասին այսօր լրագրողների հետ հանդիպման ժամանակ ասաց ՀՀ ԱՆ Պետական առողջապահական գործակալության պետ Սարո Ծատուրյանը:

Նրա խոսքերով՝  նրանց մի մասը դեռ շարունակում է բուժօգնություն ստանալ:

«Քանի դեռ հունվարը չի ավարտվել և այս թվերը ենթակա են ճշտման, ավելի կոնկրետ ցուցանիշներ կունենանք  որոշ ժամանակ անց: Հիվանդանոցային բուժօգնության հիմնականում դիմել են բարդություններով դեպքերը»,- ընդգծեց  Սարո Ծատուրյանը՝  հավելելով, որ սովորական գրիպի դեպքերը պոլիկլինիկական բուժման ենթական են և պոլիկլինիկաներում  էլ դիմելիությունը բարձր եղել է:

Ըստ նրա ՝  հիվանդանոցային դիմելիության դեպքերի շուրջ 60 տոկոսը պետական պատվերի շահառուներն են եղել, որոնք բուժվել են անվճար: Դրանց մեծ մասը եղել են երեխաներ, իսկ երեխաների բուժումը երկրում անվճար է:

«Անվճար բուժօգնություն են ստացել և շարունակում են ստանալ բոլոր սոցիալական խմբերին պատկանող անձինք»,- տեղեկացրեց Սարո Ծատուրյանը:

Հաշվի առնելով հիվանդության տարածումը զսպելու անհրաժեշտությունը և կարևորությունը, հունվարի 1-ից  20-ն անկախ սոցիալական խմբից և կարգավիճակից,  բոլոր քաղաքացիների բուժօգնությունն իրականացվել է անվճար:

Ինչ վերաբերում է  հունվարի 20-ից հետո դիմողներին, ապա Ս.Ծատուրյանը ընդգծեց, որ շարունակում է գործել պետպատվերի բոլոր չափորոշիչները, իսկ այն դեպքերում, երբ քաղաքացին ունի վճարելու հետ խնդիր և պետք է հոսպիտալացվի, կա համապատասխան ծառայության որոշմամբ սահմանված մեխանիզմ:

«Այն  իրավասություն է տալիս բուժհիմնարկների տնօրեններին, բոլոր պետական պատվեր կատարող բուժհիմնարկների տնօրեններին, որոշակի սահմաններում, տվյալ հիմնարկի բյուջեի 5 տոկոսի սահմաններում առանց որևէ սոցիալական հիմք հանդիսացող փաստաթղթի տվյալ քաղաքացու բուժօգնությունը կատարել անվճար: Այդ դեպքը փոխհատուցվում է առողջապահության նախարարության կողմից»,- հայտարարեց Ս.Ծատուրյանը: