Ձեր վստահելի աղբյուրը

«Պաշտպանվելու ենք մինչև վերջ», -Panorama.am-ի թղթակցի հետ զրույցում ասաց «Շենգավիթ» բժշկական կենտրոնի մանկաբարձ-գինեկոլոգ Շուշանիկ Բախշյանի փաստաբան Ալեքսանդր Սիրունյանը:

Իսկ պաշտպանվելուն ուղղված միջոցառումների շրջանակում փաստաբանը մի շարք միջնորդություններ է ներկայացրել:

Մասնավորապես, պաշտպանական կողմը գտնում է, որ դատաբժշկական փորձաքննությունները կատարվել են  թերի, քանի որ փորձագետն արել է այնպիսի հետևություններ, որոնք չկան փորձագիտական եզրակացության մեջ: Հետևաբար, պաշտպանական կողմը վարույթն իրականացնող քննիչին միջնորդել է, որ անցկացվեն լրացուցիչ փորձաքննություններ:

Պաշտպանական կողմի համար հայտնի չէ, թե ինչ հիմքով և ինչ ապացույցների հիման վրա են Շուշանիկ Բախշյանի նկատմամբ մեղադրանք առաջադրել, և Սիրունյանն ու իր գործընկեր փաստաբան Կարեն Կիրակոսյանը քննիչին միջնորդել են «հանգամանորեն ներկայացնել յուրաքանչյուր ապացույցի բովանդակությունը»:

«Թող ապացույցներ ներկայացնեն և ոչ թե զրույցներ: Սոցիալական ցանցի գրառումը ապացույց չէ: Օրենքն ասում է, թե որոնք են ապացույցները, իսկ դրանք 13-ն են: Թող թույլատրելի ապացույցները դնեն մեր դեմ, մենք էլ բոլորին ցույց կտանք դրանք, թող միայն այդ ապացույցները ցույց տան», -հավելեց փաստաբան Սիրունյանը:

Հաջորդիվ Բախշյանի փաստաբանները միջնորդել են Շուշանիկ Բախշյանի և փորձագետ Գագիկ Հարությունյանի միջև կատարել առերեսում: Բանն այն է, որ ըստ փաստաբանների, փորձագետ Հարությունյանը ցուցմունք է տվել, որի ժամանակ արել է հետևություններ, որոնք չկան փորձագիտական եզրակացության մեջ:

«Այսինքն, փորձագետի ցուցմունքով լրացվել է փորձագետի եզրակացությունը, ինչն արգելված է քրեական դատավարության օրենսգրքով: Այս պայմաններում Շուշանիկ Բախշյանը իրավունք ունի հարցման ենթարկել Գագիկ Հարությունյանին», -նշել են պաշտպանները ու միջնորդել, որ նրանց միջև կատարվի առերեսում:

Փաստաբանն ասաց, որ Շուշանիկ Բախշյանը երկկողմանի թոքաբորբ է ունեցել, բայց բուժումն ստանալուց հետո այժմ դուրս է գրվել հիվանդանոցից: Հիվանդ լինելու պատճառով մեղադրյալը չի մասնակցել քննչական գործողություններին:

«Նա չէր կարող մասնակցել քննչական գործողություններին, և հենց հիվանդության պատճառով որոշ գործընթացներ հետաձգվեցին», -փոխանցեց Սիրունյանը` նշելով, որ իր պաշտպանյալի ինքնազգացողությունը այժմ բավարար է, բայց ունի թուլություն:

Իր պաշտպանյալին կալանավորելու հնարավորության մասին հարցին ի պատասխան Սիրունյանն ասաց, որ իրենք «ապօրինություն թույլ չեն տալու» ու հավելեց. «Հունվարի 22-ին մենք ապօրինություն թույլ չտվեցինք: Օրենքով ինչ հասնում է, թող անեն, օրենքով ու ողջամտության մեջ»:

Հիշեցնենք` «Էրեբունի» բժշկական կենտրոն տեղափոխված Մերի Մարգարյանը մահացել էր հուլիսի 29-ին` հուլիսի 27-ին կատարված կեսարյան հատումից հետո: Նրա մոտ ախտորոշվել էր «HELLP» սինդրոմ (մանկաբարձության մեջ հազվադեպ հանդիպող բարդություն) համախտանիշի թոքաբորբ: Հուլիսի 30-ին էլ մահացել էր նաև նրա նորածին դուստրը:

Դեպքի առթիվ հարուցվել էր քրեական գործ՝ ՀՀ քրեական օրենսգրքի 130-րդ հոդվածի 2-րդ մասի հատկանիշներով` «Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ»։ Հունվարի 26-ին Բախշյանին մեղադրանք էր առաջադրվել:

Մերի Մարգարյանը և նորածինը քրեական գործով ճանաչվել էին որպես տուժող, իսկ Մերի Մարգարյանի հայրը` Վաղինակ Մարգարյանը, տուժողների իրավահաջորդ:

Քննչական կոմիտեից հայտնել էին, որ դեպքի առթիվ նյութերի նախապատրաստման ընթացքում պարզվել էր, որ Մերի Մարգարյանը 4 օր շարունակ ունեցել է բարձր ջերմություն, սակայն բժշկական օգնություն և սպասարկում իրականացնող «Շենգավիթ» ԲԿ բժշկուհի Շուշանիկ Բախշյանը, պարտավոր լինելով կնոջը հոսպիտալացնել, հրաժարվել և չէր կատարել իր պարտականությունները։