Ձեր վստահելի աղբյուրը

Պորտֆելների մասին խոսակցությունները վաղ են, որովհետև դրա հետ կապված պայմանավորվածություն գոյություն չունի: Այդ մասին այսօր Ազգային ժողովում լրագրողների հետ ճեպազրույցում հայտարարեց ԱԺ Դաշնակցություն խմբակցության ղեկավար Արմեն Ռուստամյանը:

Լրագրողների դիտարկմանը, թե քիչ պաշտոններ են նախատեսվում դաշնակցության համար, Ռուստամյանը պատասխանեց. «Շատի քչի հարց չի: Բանակցություններ են ընթանում նաև այդ հարցի շուրջ, բայց մենք դեռ չենք հասել, որևէ եզրակացության», -հավելեց դաշնակցական պատգամավորը:

Լրագրողը նկատեց, թե խոսակցություններ են գնում Տարածքային կառավարման և էկոնոմիկայի նախարարություննները դաշնակցությանը հանձնելու մասին, Ռուստամյանը արձագանքեց. «Կարող եք խոսել բոլոր նախարարությունների մասին: Այս փուլում բոլորի մասին էլ կարելի է խոսել, քանի դեռ համաձայնություն չի եղել: Համաձայնություն կլինի, կհայտարարենք»:

Նա հստակեցրեց, որ համագործակցության առաջարկն արվել է Հանրապետական կուսակցության կողմից և շարունակեց. «Մենք քննարկել ենք ու ներկայացրել ենք մեր մոտեցումները: Այդ մոտեցումները, ի վերջո, պետք է ի մի բերվեն, որից հետո կհապարակվեն»:

ԱԺ Դաշնակցություն խմբակցության ղեկավարը նկատեց, որ իրենք իշխանափոխության հիմքերը դրել են, և «ժողովուրդը ընտրությունների միջոցով իշխանափոխության հասել է»:

«Երկու հիմնական հարց է փոխվել երկրում` կառավարման համակարգը և ընտրական համակարգը: Ես վստահ եմ, որ այդ ամենի արդյունքում 2017-ին մենք ունենալու ենք աննախադեպ որակով ընտրություններ», -հավելեց դաշնակցականը:

Խոսելով Հանրապետական կուսակցության հետ համագործակցության մասին, Ռուստամյանն ասաց, որ սա իրական կոալիցիա չի կարող լինել, քանի որ նախագահական համակարգում նման բան չի լինում: Նա ասաց, որ եթե իրենք ոչինչ չկարողանային փոխել, չէին մտնի համագործակցության մեջ:

«Արդեն փոխել ենք: Համակարգն ենք փոխել: Սահմանադրական նոր կարգ ենք փոխել: Այդ ամենը կատարել է Դաշնակցությունը` հինգը պատգամավորով: Եթե մենք չմտնեինք այս պրոցեսի մեջ, հաստատ նման փոփոխություն չէր լինի: Մի՞թե ձեզ համար դա ակնհայտ չէ», -հավելեց պատգամավորը:

Սահմանադրական փոփոխություններից հետո, ըստ Ռուստամյանի, իրենք սկսելու են մայր օրենքից բխող մյուս բոլոր օրենքները փոփոխել, որ «ունենանք այս Սահամանդրությունից բխող օրենքներ»:

«Դուք կտեսնեք, որ այս Սահմանադրությունը մեր երկրի համար նոր շունչ է տվել, նոր էջ է բացել: Մենք դա ապացուցելու խնդիր ունենք ոչ միայն «այո» ասողներին, այլ նաև «ոչ» ասողներին: Կողքից դիտորդի դերում հանդես գալով այդ խնդիրը չէինք կարող լուծել: Իշխանության հետ լինելը վարկանիշի անկում է ենթադրում, բայց ավելի լավ է այս գինը վճարեմ, քան ազգովի պետությունը կորցնելու գինը վճարենք: Դրա համար էլ մենք այս ճանապարհով ենք գնացել ու միշտ էլ չենք վախեցել վարկանիշի կորստից»,-հայտարարեց Արմեն Ռուստամյանը ` ընդգծելով, որ «իշխանությունը հեղինակազրկված է, բայց այդ նույն իշխանություններին ժողովուրդը ձայն է տալիս»::

Նա վստահեցրեց, որ ունենալու ենք «ավելի լավ Հայաստան», թեկուզ այս ընթացքում իրենց «մի քիչ հայհոյելու գնով» ու հիշեց Սևակի տողերը.

«Հանուն Գալիք վառ խարույկի
Ես պատրաստ եմ այսօր ծխալ
Հանուն վաղվա ճշմարտության
Թող որ լինեմ այսօր սխալ»