Ձեր վստահելի աղբյուրը

Մարդու իրավունքների պաշտպանի թեկնածուին պետք է առաջադրի հենց ԱԺ Մարդու իրավունքների պաշտպանության հարցերի մշտական հանձնաժողովը, ոչ թե պետա-իրավական հարցերի մշտական հանձնաժողովը: Այդ մասին այսօր Ազգային ժողովի նիստում «ՀՀ Ազգային ժողովի հինգերորդ գումարման մշտական հանձնաժողովների թիվը, անվանումները և գործունեության ոլորտները սահմանելու մասին» ԱԺ որոշման նախագծի քննարկման ժամանակ հայտարարեց ԱԺ «Ժառանգություն» խմբակցության անդամ Զարուհի Փոստանջյանը:

Նշենք, որ այս որոշումն ԱԺ-ում ընդունվել է 2012 թվականին և 2015 թվականի Սահմանադրական փոփոխություններից հետո անհրաժեշտություն է առաջացել դրանում կատարել փոփոխություններ: Կատարվվող փոփոխություններով,  առաջարկվում է սահմանել, որ ԱԺ պետական-իրավական հարցերի մշտական հանձնաժողովն է իրավասու Ազգային ժողովին ներկայացնել Մարդու իրավունքների պաշտպանի թեկնածուի վերաբերյալ առաջարկություն:

Բացի այդ, որոշման նախագծով սահմանվում է Մարդու իրավունքների պաշտպանի թեկնածուների վերաբերյալ հանձնաժողովին դիմումների ներկայացման կարգը և ժամկետները: Ըստ նույն որոշման նախագծի, Ազգային ժողովին Մարդու իրավունքների պաշտպանի պաշտոնում ընտրելու համար թեկնածու է առաջարկվում  Հայաստանի Հանրապետության պետական-իրավական հարցերի մշտական հանձնաժողովի որոշմամբ՝ հանձնաժողովի անդամների ընդհանուր թվի առնվազն 1/3-ի գրավոր դիմումով ներկայացված թեկնածուների թվից:

Այսօր որոշման նախագիծը ներկայացնելիս ԱԺ պետական-իրավական հարցերի մշտական հանձնաժողովի նախագահ Հովհաննես Սահակյանն ասաց, որ հանձնաժողովի յուրաքնաչյուր անդամ կարող է իր թեկնածուին առաջարկել:

«Դուք գնացիք այն ճանապարհով, որ առաջադրվեն մի քանի թեկնածուներ, բայց դրանցից ընտրվելու է մեկը: Որպեսզի լինի մրցակցություն, այսինքն լիագումար նիստի կողմից կատարվի ընտրություն, պետք է առնվազն երկու թեկնածու լինի, որ մենք` պատգամավորներս այդ երկուսի միջև կատարենք ընտրություն, բայց դուք հիւմա ֆիլտրում եք` թողնելով մեկին», -այսօրվա քննարկման ժամանակ նկատեց Փոստանջյանը:

Նրա խոսքով, մեկ թեկնածու ներկայացնելը մրցակցային չէ և չի տալիս ընտրության հնարավորություն:
Ընդդիմադիր պատգամավորի առաջին դիտարկմանը արձագանքելիս, հանձնաժողովի նախագահ Հովհաննես Սահակյանը նկատեց, որ «տրամաբանության և ողջամտության սահմաններում է ընտրվել պետա-իրավական հանցերի մշտական հանձնաժողովը»: ԱԺ-ում կա տեսակետ, որ ընտրվել է ԱԺ պետա-իրավական հարցերի հանձնաժողովը, քանի որ այստեղ Հանրապետական խմբակցությունը մեծամասնություն է կազմում և կարող է իրեն ցանկալի թեկնածուին մղել առաջ:

Ինչ վերաբերում է թեկնածուների քանակի հարցին, ապա Սահակյանն ասաց, որ իրենք բոլոր խմբակցություններին հնարավորություն են տվել ներկայացնել իրենց թեկնածուներին. երբ համապատասխան ձայներ չեն հավաքում թեկնածուները, անցնում են երկրորդ փուլ, առավել ձայներ հանած թեկնածուները հանձնաժողովի շրջանակներում նորից անցնում են քվեարկության փուլ և դրանից հետո միայն առավել ձայն ստացած թեկնածուն առաջադրվում է ԱԺ լիագումար նիստին: