Ձեր վստահելի աղբյուրը

Ժնև 3-ը, ինչպես և առաջին երկու հանդիպումները, ի սկզբանե դատապարտված է տապալման: Լրագրողների հետ հանդիպման ժամանակ ասաց արտակարգ և լիազոր դեսպան, Ռուս-հայկական (Սլավոնական) համալսարանի Համաշխարհային քաղաքականության և միջազգային հարաբերությունների ամբիոնի վարիչ Արման Նավասարդյանը:

Հիշեցնենք, որ Ժնևում ընթանում է Սիրիայի հարցով բանակցությունները: Սիրիական ընդդիմության ներկայացուցիչները նախօրեին ժամանալ են  Ժնև՝ մասնակցելու բանակցություններին:

«Այս բանակցությունների նպատակն այն է, որ  հակամարտող կողմերը նստեն սեղանի շուրջ,  միասին խնդրի լուծման ճանապարհ գտնեն, դադարեցնեն արյունահեղությունը, որը ցնցում է ամբողջ աշխարհը հիմքերից: Առաջին և երկրորդ հանդիպումները որևէ արդյունք չտվեցին: Այստեղ կարևորը մասնակիցներն են, թե ովքեր են նստում բանակցային սեղանի շուրջ: Ըստ համաձայնագրի, պետք է նստեն  Սիրիայի նախագահ Ասադին ներկայացնող պաշտոնական ուժերը, երկրորդ՝ ընդդիմությունը: Հենց այստեղ առաջ է գալիս խնդիր՝ ո՞վ է ընդդիմությունը»,- ասաց դիվանագետը:

Ըստ նրա, հետևելով Մերձավոր Արևելքի քաղաքականության ընթացքին, հասկանալի է դառնում, որ բոլորը կռվում են բոլորի դեմ, բացի հիմնական ընդդիմադիր ուժերից, մուսուլմանական ահաբեկչական կազմակերպություններից, գործում է 2500 ռազմական մեծ և փոքր միավորում:

«Սրանք մեկ միանում են, մեկ հեռանում: Սրանց հետևում կան քաղաքական ուժերը. օրինակ՝ մի մասը ԱՄՆ ուժերն են, բայց հիմնականում տարածաշրջանի ուժերն են: Նրանք, ովքեր հանդես են գալիս ընդդիմադիրներ ու նստում բանակցային սեղանի շուրջ, բացարձակապես իրենցից չեն ներկայացում ոչ ահաբեկչական, ոչ էլ ընդդիմադիր ուժ: Սրանք այն միավորումներն են, կազմակերպությունները, որոնց Սաուդյան Արաբիան հավաքեց իր շուրջ, թրեյնինգ արեց և ուղարկեց այնտեղ մեկ նպատակով՝ տապալել Ժնև - 3-ը, ամեն ինչ անեն, որ այն չստացվի»,- ասաց Ա.Նավասարդյանը՝ հավելելով, որ բանակցությունների դեմ միացյալ ճակատով հանդես են գալիս Սաուդյան Արաբիան, Թուրքիան, Քաթարը, որոնք նպատակ ունեն հոշոտելու, կիսելու ամբողջ Սիրիան, բաժանելու իրար մեջ:

Ըստ նրա, Թուրքիան ամեն ինչ անում է տապալելու սիրիական խնդրով բանակցային գործընթացը,  օգնում է նաև «Իսլամական պետություն» ահաբեկչական խմբավորմանը: 

Արտակարգ և լիազոր դեսպանի խոսքով,  Սիրիայի հարցով բանակցություններին իր մասնակցությունը պետք է ունենա նաև Հայաստանը:

«Մենք Մերձավոր Արևելքի մասնիկն ենք, և Հայաստանը, որպես պետություն, միջազգային իրավունքի սուբյեկտ, պետք է մասնակցի բանակցություններին՝ ելնելով մեր ազգային շահերից, նաև որոշ չափով լուծվում է մեր համայնքների հարցը: Իսկ մենք ինչո՞ւ այնտեղ չենք, հնարավո՞ր էր, որ լինեինք: Չգիտեմ: Այս հարցերին պետք է այն մարդիկ պատասխան տան, ովքեր կոչված են լուծելու այդ հարցը»,- ասաց նա: 

Ըստ Ա.Նավասարդյանի, Հայաստանը կարող էր դիվանագիտական ճանապարհով դիմել ՄԱԿ, ցուցակագրվել, ապացուցել բանակցություններին մասնակցելու իր անհրաժեշտությունը և մասնակցել բանակցային գործընթացին: