Ձեր վստահելի աղբյուրը

«Զիկա»  վարակը տարածվում է հիմնականում մոծակի միջոցով,  նման տեսակի մոծակներ Հայաստանում չեն բնակվում՝ բնակլիմայական պատճառով:  Ազգային ողովում կառավարության հետ հարցուպատասխանի ժամանակ ասաց առողջապահության նախարար Արմեն Մուրադյանը՝ պատասխանելով ՕԵԿ-ական պատգամավոր Հովհաննես Մարգարյանի հարցին, որ ժողովրդի շրջանում մտահոգություն կա «Զիկա» վարակի հետ կապված:

Նախարարն ասաց, որ Հայաստանում այդ վարակի տարածման հավանականությունը շատ ցածր է, Հայաստանն այդ հիվանդությունից դուրս գոտիում է գտնվում. «Հավանական է, եթե այն երկրներում, որտեղ հայտարարել է Առողջապահության համաշխարհային կազմակերպությունը,  վարակվեն»:  

«Ինչ վերաբերում է մարդուց մարդուն անցնելուն՝ սեռական ճանապարհով, չի ապացուցվել, միայն մոծակի միջոցով է անցնում»,- նշեց Ա.Մուրադյանը:

Նա ասաց, որ այդ վարակը հիմնականում վտանգ է սպառնում հղիներին. «Խորհուրդ չենք տալիս հղիներին մեկնել այն երկրներ, որտեղ տարածված է: Մենք արդեն համապատասխան մեթոդական ձեռնակներով ապահովել ենք հակահամաճարակային ծառայությունները, ծննդատները, հիվանդանոցները»:

Ա.Մուրադյանը նշեց, որ միայն 20 տոկոս դեպքերում է արտահայտվում այդ հիվանդությունը և պահանջվում է համապատասխան բուժում:

«Համապատասխան պատվաստումներ այս պահին չկա, մենք զուտ սիմպտոմատիկ բուժում պետք է  նշանակենք, հսկողություն սահմանենք»,- ասաց նախարարը: 

Նշենք, որ «Զիկա»-ն հիմնականում մոծակի միջոցով է փոխանցվում, ու տարածման համար երկրում պետք է լինի տվյալ տեսակի մոծակը: Զիկա տենդի ախտանշաններն են՝ տենդ, ցան, հոդացավեր, շաղկապենու բորբոքում, մկանացավեր, գլխացավ: Զիկա տենդի գաղտնի շրջանը ստույգ հայտնի չէ, ենթադրվում է որ այն տևում է մի քանի օրից մինչև մեկ շաբաթ: Զիկա վիրուսով հարուցված միջին ծանրության հիվանդությունը տևում է մի քանի օրից մեկ շաբաթ: Վիրուսը արյան մեջ պահպանվում է մի քանի օր, սակայն որոշ հիվանդների արյան մեջ այն հայտնաբերվում է ավելի երկար: Մահվան դեպքեր հազվադեպ են գրանցվում: