Արտակ Շաբոյան. Տնտեսվարողների բիզնես գործունեությունը մենք չենք կարող մեկնաբանել

Տնտեսություն 17:00 04/02/2016 Հայաստան

Արտակ Շաբոյան. Տնտեսվարողների բիզնես գործունեությունը մենք չենք կարող մեկնաբանել

ՀՀ կառավարության նիստից հետո լրագրողները ՏՄՊՊՀ նախագահ Արտակ Շաբոյանից հետաքրքրվեցին, թե ինչո՞ւ են Ռուսաստանում բենզինի գները երկու անգամ էժան Հայաստանի գներից:

«Հայաստանում բենզինի գները շարունակական նվազման միտում են դրսևորում: Բնականաբար, փոխարժեքի արժեզրկումը շատ կարևոր նշանակություն ունի, քանի որ բենզինը ներկրվում է արտարժույթով, դրա դիմաց վճարումները կատարվում են արտարժույթով, իսկ երկրի ներսում վաճառվում է հայկական դրամով: Այս երկու տարիների ընթացքում հայկական դրամի փոխարժեքն արժեզրկվել է մոտ 17-18 տոկոսով: Բնականաբար, դա իր ազդեցությունն է թողել»,-ասաց Արտակ Շաբոյանը:

Լրագրողների հարցին, թե ի վերջո ինչով է բացատրվում, որ Ռուսաստանում բենզինը երկու անգամ էժան է, քան Հայաստանում, Արտակ Շաբոյանը պատասխանեց. «Բենզինը հիմնականում ներկրվում է ՌԴ-ից: Բենզին ներմուծող ընկերությունների գնային փոփոխություններն ադեկվատ են ձեռքբերման գների փոփոխություններին: Մեր օրենսդրության առումով մենք չարաշահման երևույթներ չենք տեսնում, գնային չարաշահման երևույթներ չկան: Ավելին, մրցակցության պաշտպանության մարմնի խնդիրն է հանդիսանում՝ պարզել՝ կան արդյոք շուկայում մուտքի խոչընդոտներ, թե՝ ոչ:

Ուսումնասիրության արդյունքներում այս ոլորտում, այս շուկայում մուտքի խոչընդոտներ, մրցակցության սահմանափակման երևույթներ չկան»:

Միաժամանակ Ա. Շաբոյանն ասաց, թե տնտեսվարողների բիզնես գործունեությունը իրենք չեն կարող մեկնաբանել: «Եթե կան ընկերություններ, որ կգտնեն քաղաքներ, երկրներ, որտեղ ավելի էժան է, կարող են ավելի էժան ձեռք բերել և ավելի շատ եկամուտ ստանալ, ապա կարող են հանգիստ զբաղվել այդ գործունեությամբ»,- նշեց ՏՄՊՊՀ նախագահը:

Նշենք, որ գործադիրի այսօրվա նիստում Արտակ Շաբոյանը ներկայացրել է բենզինի շուկայում իրականացրած ուսումնասիրությունների արդյունքները:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: