Հայ-բրիտանական հարաբերությունների ակտիվացման համար իրական խոչընդոտներ չկան. ԱԺ նախագահ
Հայաստանը շահագրգռված է ընդլայնելու տնտեսական, առևտրային և մշակութային հարաբերությունները Մեծ Բրիտանիայի հետ և հայ-բրիտանական հարաբերությունների ակտիվացման համար իրական խոչընդոտներ չկան: Այս մասին նշել է ԱԺ նախագահ Գալուստ Սահակյանը՝ այսօր ՀՀ-ում Մեծ Բրիտանիայի և Հյուսիսային Իռլանդիայի Թագավորության արտակարգ և լիազոր դեսպան Ջուդիթ Ֆարնվըրթի հետ հանդիպման ժամանակ:
ԱԺ հասարակայնության և տեղեկատվության միջոցների հետ կապերի ծառայությունից հայտնում են, որ Գալուստ Սահակյանն անդրադարձել է անցյալ շաբաթ Եվրոպայի խորհրդի խորհրդարանական վեհաժողովի ձմեռային նստաշրջանի ժամանակ Լեռնային Ղարաբաղի հակամարտությանն առնչվող երկու բանաձևերին, որոնք, նրա գնահատմամբ, խեղաթյուրում էին իրականությունը և արգելակում ղարաբաղյան խնդրի շուրջ խաղաղ բանակցային գործընթացը՝ թյուրիմացության մեջ գցելով միջազգային հանրությանը:
Խորհրդարանի ղեկավարը նշել է, որ բրիտանացի նախկին պատգամավոր Ռոբերտ Ուոլթերի հեղինակած «Բռնության աճը Լեռնային Ղարաբաղում և Ադրբեջանի այլ օկուպացված տարածքներում» վերնագրով բանաձևը քվեարկությամբ չընդունվեց շնորհիվ ԵԽԽՎ այն պատգամավորների, որոնք քվեարկեցին հանուն արդարության:
«Այդ բանաձևը պարունակում էր լուրջ վտանգ, քանի որ այն անթույլատրելի փորձ էր Ադրբեջանի և իր համախոհների կողմից՝ այլ զուգահեռ հարթակներ տեղափոխելու ղարաբաղյան հիմնահարցի կարգավորումը»,- ասել է պարոն Սահակյանը:
Խորհրդարանի ղեկավարը նշել է, որ Հայաստանը շարունակում է հավատարիմ մնալ ԵԱՀԿ Մինսկի խմբի համանախագահության հովանու ներքո ընթացող բանակցային գործընթացին, որը դիտարկում է Լեռնային Ղարաբաղի հակամարտության կարգավորման միջազգայնորեն ճանաչված միակ հարթակը:
Դեսպան Ջուդիթ Ֆարնվըրթը նույնպես կարևորել է երկկողմ հարաբերությունների զարգացումը կրթական, առևտրատնտեսական, մշակութային և այլ ոլորտներում: Հայ-բրիտանական փոխգործակցության խորացման առումով դեսպանն արժևորել է Հայաստանի և Մեծ Բրիտանիայի խորհրդարանների միջև տարբեր մակարդակներով պատվիրակությունների երկկողմ այցերը:
Հանդիպման ընթացքում անդրադարձ է կատարվել սահմանադրական բարեփոխումների գործընթացին: Դեսպանը ողջունել է խորհրդարանական կառավարմանն անցնելու՝ Հայաստանի Հանրապետության իշխանությունների որոշումը:
Իսկ Ռոբերտ Ուոլթերի հեղինակած հակահայ զեկույցի վերաբերյալ տիկին Ջուդիթ Ֆարնվըրթը նշել է, որ անհատի զեկույցը չի արտացոլում կառավարության քաղաքականությունը և հավելել, որ Մեծ Բրիտանիան կողմնակից է Լեռնային Ղարաբաղի հիմնախնդրի խաղաղ կարգավորմանը:
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
