Ձեր վստահելի աղբյուրը

Ազգային ժողովի պատգամավոր Էդմոն Մարուքյանի ելույթին երեկվա նիստում  ԱԺ փոխնախագահ Էդուարդ Շարմազանովի տված որակումը վրդովեցրել էր պատգամավորին: Նա այսօր բարկացած ելույթ ունեցավ ԱԺ ամբիոնից:

Շարմազանովը, ըստ Մարուքյանի, իր ելույթում արտահայտությունները որակել էր «գավառամտություն»: Պատգամավորների միջև տարաձայնությունն առաջացել էր «Կենսական նշանակության ճանապարհային ցանցի բարելավման ծրագրի համար լրացուցիչ ֆինանսավորում» վարկային համաձայնագրի քննարկման ժամանակ:

«Անընդունելի է, որ պատգամավորները միմյանց քննադատում են ու միմյանց վերագրում են վիրավորական մտքեր: Ասում եք, թե գավառամտություն ենք քարոզում այս ամբիոնից: Ասում եք, թե մենք հայտարարում ենք, որ մարզերում վիճակը վատ է և դրա մեղավորը մայրաքաղաքն է: Ո՞վ է նման բան ասել: Մարզեր և մայրաքաղաք հակադրությունը դուք եք անում, ոչ թե մենք: Ու շատ պրիմիտիվ ձևով եք անում, ելույթները կան ու բոլորն էլ սոցցանցերում քննարկում են: Ո՞վ է թույլ տվել, որ ԱԺ նախագահությունը մտնի պատգամավորի սահմանադրական իրավունքների տարածք, իմ սահմանադրական իրավունքն է ելույթ ունենալ այս ամբիոնից, ինչ պետք է, ես կասեմ, ո՞վ իրավունք ունի մտնել ՝ իմ ելույթը ցենզուրայի ենթարկել: Մեկին վիրավորե՞լ եմ, բա վիրավորանք ինչո՞ւ է հնչում, ինչո՞ւ եք ասում թե մեր խոսքերը գավառամտություն են: Չերչիլն ասել է`  «Պատասխանատվությունն այն գինն է, որը մենք վճարում ենք իշխանության համար», այսօրվա Հայաստանը ձեր պատասխանատվության արտացոլանքն է, այն Հայաստանը որտեղ ապրում է 1 մլն աղքատ մարդ: Ավելին, եթե ընդունենք, որ կա գավառամտություն, ապա ավելի լավ է լինել ազնիվ գավառամիտ, քան կեղծավոր քաղքենի: Այսօրվա Երևանը այդ էժանագին քաղքենիության զոհն է. երբ քանդում են պատմաճարտարապետական արժեքները», -հայտարարեց Մարուքյանը:

Նա բոլորին զգուշացրեց, որ եթե վիրավորեն ԱԺ ամբիոնից, ապա պատասխանը հենց այդտեղից կստանան, եթե «ջրից, ապա կստանան ջրից, եթե օդից, ապա օդից»:

Մարուքյանի այս ելույթը Շարմազանովն անարձագանք չթողեց ու խնդրեց չխմբագրել իր խոսքերը:

«Խոսքը եղել է այն մասին, որ պետք չէ Երևանը հակադրել մարզերին: Որևէ վիրավորական արտահայտություն չի եղել, այլ ասվել է` գավառական մտածողություն: Պետք չէ գերագնահատել սեփական հնարավորությունները: Սա պառլամենտ է և սովորեք այլակարծությանը, սովորեք բազմակարծություն լսել , սա պառլամենտ է ոչ թե գլադիատորական մարտեր»,-հավելեց ԱԺ փոխնախագահը:

Նկատենք, որ քննարկվող վարկային համաձայնագրով, նախատեսվում է, որ ՎԶՄԲ-ն  25 տարի մարման ժամկետով Հայաստանին կտրամադրի 40 մլն ԱՄՆ դոլարի չափով վարկ:  Ծրագրի նպատակն է բարելավել ընտրված կենսական նշանակության ճանապարհները, մասնավորապես գյուղական համայնքներն արդի ճանապարհային ցանցի միջոցով կապել մայրուղիներին և հանրապետական ու միջպետական նշանակության  ճանապարհներին: ծրագիրը շարունակական է, այն մեկնարկել է 2013 թվականին. նախատեսվում է վերակառուցել 190 կմ ճանապարհ: