Այդքան էլ զենքերը վայր դնող չէ. Բաղդասարյանը` Արման Թաթոյանի մասին

Քաղաքական 16:20 05/02/2016

Այդքան էլ զենքերը վայր դնող չէ. Բաղդասարյանը` Արման Թաթոյանի մասին

Մարդու իրավունքների պաշտպանի պաշտոնում ՀՀԿ-ի կողմից առաջադրված Արման Թաթոյանին և նրա գործունեությանը ծանոթանալու համար, ԱԺ Հանրապետական խմբակցության ղեկավար Վահրամ Բաղդասարյանը խորհուրդ է տալիս կարդալ նրա կենսագրությունը:

«Բավականին փորձ ունեցող անձնավորություն է: Ում էլ որ դնեինք՝ պիտի ասեիք՝ ինչո՞ւ նա: Այդ բոլոր նա-երի մեջ մենք ընտրել ենք Արման Թաթոյանին», - ասաց Բաղդասարյանը` տեղեկացնելով, որ Հանրապետական խմբակցության նիստում պատգամավորները միաձայն հավանություն տվեցին Արման Թաթոյանի թեկնածությանը:

Բաղդասարյանը ասաց, որ Արման Թաթոյանը հանդիպելու է ԱԺ մյուս խմբակցությունների պատգամավորների հետ, որպեսզի կարողանա նրանց շահագրգռել ու ապահովել իր ընտրվելու համար անհրաժետ ձայները:

Նշենք, որ նոր Սահմանադրությամբ Մարդու իրավունքների պաշտպանն ընտրվելու է ԱԺ պատգամավորների 3/5-րդի կողմից:

Ներկայացնելով խմբակցության նիստից մանրամասներ, Վահրամ Բաղդասարյանը տեղեկացրեց, որ Թաթոյանին հարցեր են տվել ու պատասխաններից հասկացել են, որ «պատրաստակամ է, և այդքան էլ զենքերը վայր դնող չէ, ճնշումների ու քննադատությունների արդյունքում չի հրաժարվի»:

«Ինքն այսօր կարևոր հայտարարություն արեց, որ այսօր ՀՀԿ թեկնածուն է, ընտրվելուց հետո կդառնա ժողովրդի թեկնածուն»,- փոխանցեց իշխանական խմբակցության պատգամավորը:

Թեկնածուների առաջադրման ժամկետը մինչև փետրվարի 9-նն է: Իսկ ԱԺ Պետա-իրավական հարցերի մշտական հանձնաժողովում ՄԻՊ թեկնածուների հարցը կքննարկվի փետրվարի 12-ին:

Հարակից հրապարակումներ`

Արման Թաթոյանը պաշտոնապես առաջադրվեց. «Կարող եմ լինել անկաշկանդ»

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: