Ձեր վստահելի աղբյուրը

Սյունիքի մարզ կատարած աշխատանքային այցի շրջանակներում ՀՀ նախագահ Սերժ Սարգսյանը այցելեց Զանգեզուրի Պղնձամոլիբդենային կոմբինատ, որտեղ ծանոթացավ իրականացված ներդրումներին և կոմբինատի զարգացման ծրագրերին:

Նախագահը շրջայց կատարեց կոմբինատի տարածքում, ծանոթացավ ձեռնարկության արտադրողականության և կառավարման արդյունավետության բարձրացման նպատակով վերջին շրջանում կատարված աշխատանքներին:

Նախագահին ներկայացվեց շուրջ 11 մլրդ դրամ արժողությամբ նոր շահագործման հանձնված աղացը, որը, կոմբինատի մասնագետների հավաստմամբ, կբարձրացնի ձեռնարկության արտադրողականությունը և կառավարման արդյունավետությունը շուրջ 22 տոկոսով:

Նախագահը այցելեց նաև կոմբինատի վերանորոգված ճաշարան, որը օրեկան շուրջ 700 աշխատակիցների է սպասարկում:

Լրագրողների հետ զրույցում Պղնձամոլիբդենային կոմբինատի արտադրության պետ Ղազարոս Բեզիրգանյանը նշեց, որ հիմա հանքարդյունաբերության համար դժվար ժամանակներ են՝ կապված միջազգային շուկայում անբարանպաստ գների հետ, սակայն նոր գնդիկավոր աղացի գործարկմամբ կոմբինատը խնդիր է դրել այս տարի ևս ավելացնել արտադրությունը 10 տոկոսով: Արտադրության պետի խոսքով, աշխատակիցների կրճատումներ ընկերությունում չեն եղել:

Զանգեզուրի Պղնձամոլիբդենային կոմբինատում նախագահ Սերժ Սարգսյանը անցկացրել է նաև խորհրդակցություն՝ կոմբինատի զարգացման ծրագրերի և հանքարդյունաբերության ոլորտի խնդիրների վերաբերյալ: