Ձեր վստահելի աղբյուրը

Եվրասիական տնտեսական հանձնաժողովի մակրոէկոնոմիկայի և ինտեգրման հարցերի հիմնական ուղղությունների կոլեգիայի անդամ Տատյանա Վալովայան այսօր լրագրողների հետ հանդիպման ժամանակ հայտարարեց, որ Եվրասիական տնտեսական միությունում միասնական արժույթի անցնելու հարց ներկա փուլում չի քննարկվում: 

Նրա կարծիքով՝  տնտեսական ներկայիս պայմաններում  միասնական արժույթի ներդրումը կհանգեցնի տնտեսական բացասական հետևանքների:

«Մենք պետք է ընդլայնենք անդամ երկրների մակրոտնտեսական համագործակցությունը, իսկ դա կարող է արվել ԵՏՄ անդամ-պետությունների միջև կատարվող առևտրաշրջանառության դիմաց ազգային արժույթով վճարումներ կատարելու դեպքում»,- ասաց  Տատյանա Վալովայան:

Պատասխանելով հարցին, թե երբ կներդրվի ազգային արժույթներով վճարումներ կատարելու համակարգը,  նա նշեց, որ այսօր ԵՏՄ անդամ բոլոր պետությունները  հնարավորություն ունեն օգտագործել ազգային արժույթը, բայց դրա համար իրենք պետք է ստեղծեն տնտեսական հիմքեր:

Ըստ նրա՝ հայ գործընկերները ակտիվ աշխատում են ազգային արժույթով վճարումներ կատարելու գաղափարի իրականացման ուղղությամբ:

«Հայաստանի դեպքում հիմնական արտահանումը կատարվում է այլ արժույթով և սա հավելյալ խնդիրներ է ստեղծում: Առաջանում է արժույթի կոնվերտացիայի կարիք՝ դոլարից ռուբլի, հայկական դրամից դոլար և այլն: Ուստի մենք հիմա ակտիվ քննարկում ենք հարցը, թե ինչ գործիքներ կարող ենք ստեղծել ազգային արժույթով փոխանցումներ կատարելու համար, որպեսզի շահավետ լինի: Շատ շուտով կարող է իրականացվել»,- ասաց Տատյանա Վալովայան: